心夜來潮 (已結業)

呢日係旺角行完街之後，朋友就上Openrice搵左呢間近近地既打冷，叫幾個小菜，邊食邊傾計。餐廳就係旺中對面，真係好方便好就腳。選擇好多，交比朋友發板就算了。打冷當然要食香口野啦，呢個傳統鴨蛋煎蠔烙，值得一試，脆卜卜，唔會太厚粉，蠔仔都幾大隻，炸得岩岩好，蠔仔唔會有油味。我比較鍾惹呢個椒鹽寶寶寶，有好多配料，如魚仔、鮮魷﹑芋頭絲等，食落相當有層次感。炸既時間控制得好好，炸得香脆可口，鹹鹹香香咁好開胃。朋友就比較鍾意醬滷鵝腸，因為鵝腸滷得非常入味，而且好爽口好肥美，但唔會好油膩。而呢個卜卜蜆煲都相當高質，花甲好大隻，蜆肉好甜好鮮味，而且好夠熱，仲有粟米同粉絲，吸曬個湯既甜味 ，份量都幾多，加上個煲好保溫，食到最後都夠熱。至於個土窯手撕雞就好夠大隻，用荷葉包住嚟焗，熱到出煙，加上有陣鹽焗既香味，送飯真係一流，雞肉亦好滑好淋。另一個必食就係潮汕砂鍋海鮮粥，粥質地都好綿好滑，加上大蝦同肉蟹﹑排骨等，非常豐富，配料仲有莞茜同菜甫，加埋蟹膏同蝦肉既甘香，令個粥更加鮮甜惹味。整體價錢合理，食物質素唔錯，下次都可以再試下。