永和海鮮酒家

营业中

休息中

今日試了西貢呢間老字號酒家，D點心好得，試咗12樣，似乎都係自家製，另外D伙記好禮貌兼服務好，好有人情味。咖哩牛孖筋已經好少地有食得到，佢D牛孖筋煮得好淋，而且吸晒D咖哩味兼無梳打粉味，好食。乾蒸牛肉又係唔係好多地方食得到，佢D牛肉好有牛味，唔係已經「乸」到無晒味嗰D，而且無乜肥肉，好味。蝦餃嘅皮同餡都做得好好，皮夠薄夠爽口，入面隻蝦同埋D筍都好好味。燒賣結實彃牙新鮮好食。叉燒包的包做得好好，乾濕度適中，入面D叉燒都好食。大包真係好大個，個包嘅皮都一樣好食，下面幅相比大家對比一下大包同叉燒包於size上的分別。棉花雞都做得好好，魚肚(棉花)用嘅料係靚嘅，咬落去嘅質感唔錯，D雞又唔會比D頭頭尾尾你，仲加幾粒杞子，好食。鵪春蛋燒賣又係絕種點心之一。芋角都唔係好多地方有得食，呢間都OK，不過D芋頭好似唔係太靚。春風得意腸即係春卷腸粉就中規中矩啦。芋頭鴨腳札整體唔錯，都係衰舊芋頭唔夠粉。