雅 ‧悠蔬食

营业中

休息中

因為之前同媽咪食過銅鑼灣分店，所以今次行開尖沙咀，就諗住試埋尖沙咀分店！同銅鑼灣店一樣，都係以紫色、白色為主色調，裝修比較現代化。Dinner Set好抵食，除咗基本嘅前菜、湯、主食、甜品同餐飲之外，仲包埋一款手卷，超級豐富！前菜仲有3款，紫薯藜麥蘋果奇亞籽沙律、涼拌䈑筍杯子耳同日本山藥麵線拌熱情果汁，依家天氣熱熱地，食涼拌就啱，最鐘意就係個沙律，加埋醋，食落酸酸甜甜，好開胃。手卷係蘆筍素香鬆苜蓿芽手卷，其實聽過名都係好知係食咩，但都決定要叫泥試下😛！食手卷，紫菜一定要夠爽脆，蘆筍同苜蓿芽食落好清新，冇草腥味。茶樹菇竹笙黃耳百合燉湯好足料，夠濃味！主菜方面，我就叫咗青咖哩野菜猴頭菇，配埋印度薄餅同糙米飯，咖哩椰香味好重，唔算好辣，我就鍾意用薄餅泥送咖哩，香口又香脆。媽媽就叫咗砂鍋餛飩菇鍋，雖然餛飩唔係肉餡，但加咗香菇，所以都好有鮮味，不過我食得最多嘅反而係伴菜嘅娃娃菜，好鮮甜，吸哂香菇味。甜品就揀咗洛神花玫瑰雪梨糕，相對玫瑰花味，洛神花嘅味道會出啲，微酸；另外一個就係焗蘋果酥皮盒，靚到一定要相機先食。