張公館

营业中

休息中

好耐冇去銅鑼灣飲茶，今日舅父推介V point 上樓嘅酒樓，坐低景色好開揚，有270度大海景，非常舒服明亮。酒樓有不少特色懷舊嘅點心，點心係新鮮製造。酥皮菠蘿叉燒包，咬開外皮香脆，中間叉燒肉及菠蘿粒，人口餡料冇咁杰撻撻，入口清爽啲，冇咁飽！豬潤燒賣，豬潤非常厚身，用料新鮮，入口爽甜，食得出豬潤嘅鮮甜味，底的蝦餃吸收哂鮮味，非常不錯。灌湯餃真係好耐冇聽過，湯底有雞湯乾瑤柱金華火腿的味道，非常清甜，餃中間有魚翅，香菇及蝦，絕對一個手工菜，入口感覺似食緊個佛跳牆，用料非常之豐富。百花釀竹笙，又一個手工菜，竹笙裏面釀入蝦肉一齊蒸，跟住有個蛋白嘅芡汁，入口清甜，個竹笙好爽脆，吸收哂全部嘅汁，非常鮮味。脆脆笑哈哈，而家流行嘅做法，係腸粉皮包著一些脆炸及蝦膠，蝦膠中間係有蝦嘅肉粒，所以口感好豐富，食到蝦肉之餘又好彈牙。燒味雙拼，燒腩仔及叉燒，外型做得好精緻，外皮焦香，而叉燒都燒得好香濃，調味唔算好濃，梅頭非常淋身有肉香。桂花五色糕，足足有五層嘅口味，每一層都係有唔同嘅口味有桂花，芒果，椰汁等，入口食得出唔同嘅層次，中間仲有啲果粒增加口感。生磨蛋白杏仁茶，食飽都想滋潤一下嘅甜品，又香又滑，又有杏仁香。