德國餐廳 (博文街) (已結業)

星期一未有心情返工，放工就同同事來到大角咀食好野飲下酒🙊。平日晚上唔算多人，都係啲三五成群嘅客人飲酒吹水嘅地方。見到menu有好詳盡嘅介紹，當然要試下佢地嘅招牌菜：德國鹹豬手配酸菜及薯仔沙津（$218）。超級大隻鹹豬手，店員幫我地切開左肉片同骨，食起來就方便好多喇。外皮脆而不膩係講得岩嫁，塊豬皮脆到好似薯片咁，配啤酒飲係好爽嘅。鹹豬手嘅肉都非常多，有2碟酸酸甜甜嘅醬汁，一啲都唔會食濟肚。酸菜同薯仔沙津都好清新，怕食得太多肉都唔怕，有沙津即刻覺得balance 返晒。因為第二日仲要返工，飲酒唔叻嘅我叫左枝apple cider ($62) 過下口引。飲得酒嘅話都想試下佢地個德國2L啤酒桶餐🙈。本身怕唔夠飽，叫多個pasta：香草醬煙肉三文魚意粉（$128）。好大碟，上面有5-6塊煙肉三文魚，半熟嘅，好食。醬汁就有好勁嘅橄欖油同香草味，個人非常鐘意個醬汁。意粉亦唔會太乾身，值得推薦。下次再來幫襯會想試下ribs同其他小食，同朋友飲下酒放鬆下都好寫意。