一品軒宴會廳 (已結業)

早幾日約咗朋友呢到嚟食芝士雞煲，店舖位於一樓要喺地下嘅門口行樓梯上去。推開大門就見到已經見到有自助火鍋嘅食物擺咗好多出嚟。因為我地食完呢個芝士雞煲，可以自助加湯用黎食火鍋，一鍋兩食。喺坐低等芝士雞煲黎嘅時候，就去睇下有咩火鍋食物。佢呢到為3個區域，第一個有不同嘅丸類、自製水餃、魚皮餃、鯇魚腩、響玲、牛柏葉等。第二個區域就有d熱食同冷盤，當晚就有糯米飯、雜果沙律，仲有綠豆沙等。而第三個區域就有蔬菜同埋麵食，有出前一丁同烏冬。飲品就擺喺雪櫃自助取，夠凍。行完一個圈再坐翻埋位，今晚嘅主角就到達啦！芝士雞煲！雞本身煮左大約5成熟，店員再喺上面加芝士，要留意唔好較咁大火，要慢火，仲要簡唔中攪下佢，如果唔係就會好容易燶底，但係雞肉就未熟。呢個芝士雞煲除咗芝士同雞肉呢兩個主角之外，仲有切咗細細塊嘅煙肉片做配角，加埋上黎真係好夾。當芝士溶化嘅時候，有拉絲嘅效果。雞件都唔錯，唔會整到碎濕濕。食完個芝士雞煲，就出去拎火鍋食材，無咩特別，係牛栢葉太有咬口，好似咬嘅都唔斷咁。響玲都脆，唔會淋哂。仲有好多大電視📺整體來說都唔錯。