Amitie Kitchen

营业中

休息中

有日黎H8食飯先發現原來Amitie都搬左黎H8！之前係網上經常見到好多人食推介呢間餐廳，今晚就決定收工黎見識下。呢度都幾大，坐到50人左右，燈光偏暗，行法國菜風格，雖然個feel其實比較似cafe多啲哈哈。呢度有Dinner set，啱曬我今晚一支公。Set包左餐湯、前菜沙律、主菜仲有飲品，加一後$300左右。前菜係炸蠔蓮藕片沙律。炸蠔有兩隻，每隻有兩個$1咁大都幾合格。外脆內爆汁，幾正。沙律菜預拌沙律醋，酸酸地夠開胃。餐湯係蘑菇湯，蘑菇味絕對夠啊，幾欣賞。唔會太稀又唔會太結，啱啱好啊。餐包有成三款咁多，分別係牛角包、竹炭餅乾仲有牛油餐包。有果醬又有牛油揀，食完都飽左兩成。主菜西京燒比目魚柳，伴碟有酸蘿蔔仲有甜薑。比目魚都幾大塊，西京燒燒汁甜甜地，如果有得配飯就一流喇，肉質保持到比目魚既嫩滑！跟餐係基本既汽水、啡茶之類，我就加左$15要左杯宇治抹茶牛奶朱古力。黎到都幾大杯，落左抹茶粉，沉底架所以記得要搞一搞，但係飲落又唔係好夠抹茶味，又或者話朱古力奶味太強蓋過左。味道確實係偏甜既，dinner set無甜品，就用呢杯代替吧。呢度出餐速度唔錯，15分鐘內到齊，枱與枱之間距離都夠私隱度。