麒藝館 (已結業) 查看

XO仔手持数张时代广场嘅餐饮现金券，所以就豪气地约同几位长辈去帮衬商场内一家贵价啲嘅「麒艺馆」。店子准六时开门，正门左方可见金漆字句写出「天下第一猪」，明显系招牌菜，咁梗系要试吓啦！于接待处安心量度体温时，发现原来用指定汇丰卡找数可即享八五折，精明嘅消费者一算已计到此优惠分分钟抵过用手上仅有嘅$200礼券，不过最实际都系等埋单时见机行事。用餐大堂嘅散座分隔得都几开，空间感十分足。中菜厅楼底高高，虽并无花巧之装潢，但胜在格调高雅。六人被安排入座内厅其中一张大枱，长辈都大赞阔落舒适。餐桌上摆有齐备嘅自用及公用餐具，卫生企理。茗茶每位$20，一页靓茶选择甚有贵气。细看十多页厚本餐牌时，留意到香槟、红酒、白酒嘅开瓶费为$200/枝，高级餐厅黎讲真系算好有良心㖞。服务生友善客套，落单时除咗推介招牌菜之外，因深知部份菜式如「金沙黄金虾窝巴」一客只有四件，更主动提出可安排厨房加够六人份量，当真细心周到。即烧无花菓天下第一猪（$348/例）：招牌菜天下第一猪例牌共有六件，富光泽嘅烧猪皮香脆松化，皮下脂肪唔多，猪肉软润甜美，肉汁丰腴，相信当中嘅果香甜味正正源自𩠌名中嘅「无花菓」，天下第一猪果真名不虚传！