鮨處松戶 (彩星集團大廈)

鮨處松戶係尖沙咀一間樓上居酒屋，裝修充滿90年代懷舊風格，簡單樸實 。已經營超過廿年，師傅話一路都冇轉過手，保持最初嘅樣貌同風味，以前有好多日本人幫襯，雖然近年部分日本人已經回流，但當晚依然見到有日本客人，平日午市亦非常熱鬧，師傅話好多人會專程嚟支持。餐廳空間感十足，仲有榻榻米房，適合一家大細或者一班朋友聚餐

當晚試咗佢哋嘅Omakase，每位$750，性價比相當唔錯。前菜係鱈魚白子，口感綿密Creamy，加咗柚子醋提味，酸酸地非常開胃。

接住係三款魚生，包括中拖、池魚、日本螺，每款都新鮮到不得了。拖羅厚切而肥美，入口即溶，無筋又鮮甜

壽司有五款，包括北海道帶子、真鯛、牡丹蝦加蝦膏、鯖魚同左口魚配魚邊。牡丹蝦鮮甜濃郁，蝦膏更係加分位；左口魚肥美滑嫩，魚邊嘅膠質豐富，提升咗整體層次。

煮物係辣酒煮花螺，螺肉鮮嫩爽口，充滿酒香，超惹味。

吸物方面，我哋揀左海鮮湯，湯底鮮甜濃郁，入面有帆立貝、生蠔、三文魚同章魚，配料相當豐富，每口都充滿海洋嘅鮮味。最後甜品係抹茶布甸，師傅話自己整的，極有誠意