金將軍辣蟹坊 (已結業)

今日終於可以準時收工，臨時決定同拍檔出荃灣行街食飯。去到路德圍附近見到個蟹仔招牌就過去望下原來就係呢間金將軍辣蟹坊，覺得唔錯就入去試試。入面雖然唔算大不過都有啲裝修幾企理，個menu分類都幾有創意，我地兩個人就點左四個菜，廚房都幾快手唔夠十分鐘就陸續上菜。金磚脆豆腐：侍應上菜既時候突意講要趁熱食咁我地梗係聽話啦，食落又真係外脆內滑，點小小鼓油真係食唔停口。鼓椒炒大蜆：幾入味，配啤酒一流！份量都適中😬招牌小炒王：打冷必食菜色之一！個人認為一間打冷合唔合格就睇呢味菜。呢間就有韮菜，蘿蔔條，腰果，蝦米同埋比較少見既白飯魚仔，幾有特色，口感好豐富，送飯應該可以食兩碗。招牌辣蒜蟹：老闆特別推介話平靚正一定要食！一上枱就已經閒到香味！啲炸蒜泥多到滿寫好有避風塘味道，隻蟹應該係炸過再炒，啲蟹殼已經炸脆到可以食，但係蟹肉都仲係鮮甜多汁，仲有啲蟹膏食下，好好食！今次得兩個人食唔得多，下次叫多啲朋友黎吹水飲酒再試多啲小菜。