鍾菜 (已結業) 查看

今年因为疫情关系，已经好耐无出过去堂食，而家舒缓些少，闭关咁耐，系时候出关透透气。今日天气唔错，阳光唔算太猛烈，下昼同朋友嚟到赤柱行下，咁耐无嚟，大街静咗好多，平日更加唔多人。黄昏时分，去海边吹下海风，欣赏周围大自然环境，真系几舒服。之后，我哋去咗赤柱广场三楼嘅钟菜食晚饭。钟菜系稻香集团旗下嘅一个比较高级嘅中菜馆，价钱当然贵几倍。我哋首先扫安心出行，再出示针咭先可入去。里面环境可以，安排我哋坐两人卡位，唔可以食住欣赏风景。平晚食客唔多，都几清静，相对侍应招呼亦唔算周到热情。小桌上有个自动加水机，侍应俾咗包茶叶我哋，自己加入去个茶壶，属自助形式，照收加一服务费。我哋两个人拣咗新鲜菠萝咕噜肉同胜瓜云耳炒鸡球。菠萝壳装住啲咕噜肉，旁边系一片片嘅菠萝肉，算系几有特色，新鲜菠萝做卖点，卖相系靓，但食落个咕噜肉偏甜，肉又唔脆，菠萝有几块好酸。创意食味揾只超大嘅碟去上菜，𩠌就得少少，基本上符合少油少盐要求，但食味又系一般。总结食物祇系一般，唔算特别出色，所以最后我哋都无叫饭后甜品。