拉麵台風 (已搬遷) 新店位置

星期六天，約咗幾個佬到荃灣打保齡……咦，荃灣？？嘩，我要食拉麵台風呀！！聞名已久，今天終於可一嚐啦！！常規的拉麵有五款，其中沾麵每日限售30碗，所以今天一早十二點前來到，等佢開門。等麵時，一直睇住師傅整拉麵，原來伊台風的芝士，是火焰燒過的。黑色暴雨拉麵（夏季限定），加了黑蒜油、黑芝麻和麻辣椒，我朋友竟然喺大熱天時揀咗佢？？既然係夏日限定，我冇理由唔試吓佢。一大啖湯入口（我食拉麵，一定先試湯底），黑蒜油和黑芝麻很濃香，繼而入到喉嚨時，陣陣的麻辣椒終於出來啦，放心，不會太辣，感覺相對傳統的黑湯拉麵，知道上多了一種層次。由於不是我食，其他的感覺，下面再寫。沾麵，正宗日式沾麵，將凍麵沾上熱辣辣的湯汁，入口，真正滋味無窮。為咗食嘢，可以幾盡？星期六一大早，由觀塘入到荃灣，為試一日30碗的台風沾麵！！唔駛上枱，單喺等拉麵時，見師傅整麵，碗碗都份量十足，唔只拉麵，連叉燒同配菜都大份過人。咦，點解沾麵見唔到叉燒？？唔駛咁擔心，因為呢度在某幾款的拉麵，不是給一塊塊的叉燒，而係俾一粒粒的。叉燒粒大大粒，但又不會韌。拉麵我選了偏硬身，配上餐廳用的粗身拉麵，咬感真是大滿足，再沾上用豬骨製成的濃濃濃湯，爆滿足。