佳記麵家 (已結業)

每次係公司做到把幾火，都會去佳記食個麵冷靜下。係則魚涌區做野三年幾，幫趁佳記只係近呢一年既事。一間唔起眼既小店，裝修仲保持住上世紀七八十年代既格局，之前每次行過，都係直行直過，唔知幾時幫趁過一次，自始之後就愛上呢間小店。佳記呢類橫街窄巷既小店，做既都係熟客生意，食物之外，更有一分老香港人情味。當然，佳記既食物質數都唔差，麵既水準一流，有麵香，無鹼水味，爽身有咬口，我至愛係豬手撈麵，豬手入味，豬手汁用來撈麵更係一流，或者牛腩撈麵都唔錯。我胃口比較大，一般都會叫多個淨雲吞，雲吞水準OK，唔同其他一味猛加雪藏蝦，件頭雖然細，但豬肉蝦肉平均，用台灣話講，可以話係「古早味」既港式雲吞。每當係公司做得唔開心壓力大或者做到好累，佳記都係我既避風港，坐係小店內，同阿姐一齊睇下電視吹下水，食個麵做晚餐，可以幫我放鬆心情，等我返OFFICE再搏殺過。唯一「唔滿意」既，係近排物價加得太勁，佳記都要加價。但係一個水準一流既雲吞+豬手撈麵都係三十左右，相比o的郁下過幾百蚊仲要食到一肚氣既懶高級餐廳，佳記既價錢其實相當合理。