水木日本料理 (已搬遷) 新店位置

先講環境，全店既裝修非常有格調，有日本食店既風味，加埋個開放式既廚房，能夠一路食飯一路睇住日本師傅切魚生，即時令人食慾大增。去既當日客人唔算太多，所以坐得好舒服，幾適合一家大細去。食物質素方面，真係無得彈，好多菜式都係師傅係日本學藝期間學識，又特別又好食，燒泡魚臉，啖啖白雪雪既魚肉，真係從來未試過食魚都食得咁過癮。水準高啲就有和牛刺身同刺身拼盤，和牛既味道感覺好油膩，但係個隻香味又吸引到我繼續食落去，好矛盾，重點係廚師整既意大利醬汁將佢既味道變得更濃，香濃既口味比起單單既和牛刺身更好吃，刺身拼盤係廚師發板的，每一舊都食到佢既新鮮味道，縱使有D刺身係我平時唔會叫黎食，但都好好味，可見佢地對上品既質素既堅持。最後值得一讚既係服務態度，店員全員每隔十分鐘就會斟一次茶，每次上菜都會介紹番菜式同埋食法，好有誠意。有機會一定會再去食！