彩福皇宴 (已結業)

第一次嚟係飲朋友嘅結婚酒，平日較少去酒樓飲，嗰次都算有啲驚喜。首先，食物質素比一般酒店好，最欣賞佢哋碟雞，而條魚都唔會好似一啲酒店咁蒸到韌晒。地方雖然唔係話好大，擺酒只可以放廿多圍枱，但特別之處在於有一個電動韆鞦，新人可以坐住佢入場，而且燈光音響都唔錯。今次就係嚟飲茶，我到達時班朋友已經叫咗十幾個點心，五個人嚟講都算幾誇張。大路嘅點心質素都唔錯，其中尤以炸兩最出色，當中嘅油炸鬼出奇地脆。佢哋嘅煎炸食品普遍都整得好好，例如春卷、咸水角、芝麻酥都好香口，唯一比較失敗嘅係小籠包，莫講話一滴湯都冇，個餡都好難食。隔離唔少枱都鍾意叫煲仔焗飯，啲香味連我哋都聞到，下次或者應該考慮下試。至於服務同價錢，以旺區嚟講都算合理，何況今日食咗咁多嘢都唔過百，如果唔使坐升降機上落樓就更好。