蜜庵本膳 (已結業)

天陰陰，下著毛毛雨，非常適合去間cafe 嘆個靚靚下午茶。 尖沙咀又唔少特色嘅cafe，位於赫德道呢間日式嘅cafe，下午茶夠特別，不失為打卡嘅好餐廳。環境光鮮裝修別緻，好有日式嘅風味。坐落去好舒服，即刻消除咗陰天納悶嘅感覺。 呢度出名日本嘅甘酒， 其實係冇酒精嘅，而且仲係日本養顏護膚嘅神仙水添。 抹茶甘酒拿鐵， 同坊間飲嘅綠茶拿鐵味道差唔多，但係特別在加咗甘酒，多咗一陣甘酒嘅味道，與別不同。 唔好睇呢杯嘢黑漆漆， 其實佢加入左艾草，可以理氣血， 驅走濕寒。加埋甘酒，就係艾草甘酒豆乳。 但佢嘅味道唔係個個人可以接受。 抹茶蜜火鍋拼盤， 拼盤非常精緻有水果，棉花糖，栗子蕃薯同埋艾草玉子串，番薯好淋好軟熟加埋抹茶，甜到漏呀。 櫻花做主題嘅春回大地， 六層嘅鬆餅上面鋪滿咗櫻花嘅忌廉，仲有日本草莓，櫻花豆蓉等等， 真係食到舐舐脷呀。 最後當然唔少得呢兩款出名嘅素食雪糕啦。完全冇雞蛋同埋牛奶加入，所以非常健康，但口感卻非常幼滑。 左邊係甘酒雪糕所以稱為美人雪糕，因為可以養顏， 而右邊就係咖啡味嘅雪糕，食落好濃好香嘅咖啡味。