魚滑粥粉麵茶餐廳 (已結業)

Item: 魚滑粥粉麵茶餐廳
Rating: 3
Author: 奧志雷

Yue Wat Restaurant

3.5

56 食记

味道

环境

服务

卫生

抵食

294

大埔

$50以下

粤菜 (广东)

奧志雷

等级4

2.1K

係 After 5 隊完白酒、紅酒、Rosa、突茄那、即釘遼，即時升仙爆鳥 ﹗醉成咁，係毫無記憶下仲可以啟動 AI 全天候人工智能系統，走到老遠叫到咁多野食，仲比班侍應阿姐打劫左每人一雙雪糕糯米滋添 ﹗再外賣返去 Baby Q 開大餐，再黎多幾杯大堅力氏，完全失憶兼失控，唔知自己做過咩、講過咩、去過邊、見過咩人、點返屋企。太醉了 ﹗第朝仲要暈住準時返到公司呢 ﹗爽滑魚皮、炸雲吞、淨牛腩、淨豬雜、豬潤腸粉、及第粥，攞住咁多野醉到跣呔，立即仆到，好采轉個身無事啫 ﹗

爽滑魚皮，涼浸浸撈上熟油、麻油、豉油，捲住蔥絲、薑絲、花生同吃，又香又爽又脆卜卜，惹味出眾，好好食 ﹗炸雲吞，即叫即炸，金黃鬆脆，外脆內爽，蝦香夾爽，只係調味有點偏濃，浸湯應該更好食。淨柱侯牛腩，肥騰騰油淋淋呢，味道就非常出眾喇，濃厚柱侯味道，香氣樸鼻，但淨食真係有點膩。白灼淨豬雜，我真係堅醉喎，正常情況下係唔會叫豬內臟囉，豬肚豬心豬潤豬腸沾上香蔥豉油都幾好食既，濕潤味濃，帶一絲絲鮮肉味道。及第粥，又係豬內臟添，湯底棉滑無投訴，甜味香濃，當然好食到欲罷不能啦。

蠔油菜芯，大路清新蔬菜既味道，水份充沛，葉嫩莖爽，略厭菜甜味稍遜，微弱得要命，全靠蠔油呢。質數依舊平平，好過無菜食啦。菜甜味強差人意，沾上蠔油還可以，因為莖既味道太過水，所以每次都只食葉呢。

腐乳通菜，水通呀 ﹗梗係要搶住食啦，每年得幾個月有得供應架乍。爽甜大大碌，每條莖都充滿水份，加上咸香帶微辣乳腐非常醒胃惹味，趙到索索聲，食唔停口啦。

炸南乳雞中翼，坊間傳聞招牌菜，第一次試麻麻地喎。師傅每晚輸馬嗎？炸得過火有點燶，香口就香口喇，不過有點乾有點鞋，肉汁流失仲有點縮水。免強還有點霧水般既肉汁，南乳味道不錯。下次再試，比多次機會您。

豬潤腸粉，即叫即拉熱辣辣，厚薄度、透明度、幼滑度倘算合格，沾上甜豉油味道都係一般。豬潤絲又幼又少，唔多食到豬潤，大部份都係腸粉皮，唔多夠喉喎 ﹗可否要求少薑多潤呀？哈哈。最好食都係陳漢記，皮薄餡靚料多，see through 半透明，誰與爭峰 ﹗

超級雜錦粥走蔥，多謝文師傅加料炮製，每次都特別地招乎我，咁夜有好多生料已賣晒喇，唯有黎個百鳥歸巢一鑊熟啦 ﹗一品及第雞柳蠔豉皮蛋瘦肉粥，鮮甜到不懂形容，不需添加任何調味料。勁多蠔豉，好濃郁既蠔豉甘香味道，甜美香口。及第豬粉腸外皮爽脆、裡面軟棉棉、不澀帶肉甜。豬肉丸、豬潤鮮甜味美，又爽又彈又滑。最利害係個粥底，棉滑幼細，高湯味濃，好好食。重量級大大碗喇，居然連我都食唔晒添。

泥鯭及弟粥全走，粥底真係超棉超滑超香甜，到底點煮架呢？真係搵唔到第二間可以做到咁好食 ﹗泥鯭好新鮮，魚肉鮮甜唔會腥，骨少肉多啖啖肉。豬粉腸肥美，外脆內棉。豬潤爽口嫩滑，不乾不鞋，有質數。

田雞魚腩粥走蔥走花生，我淨係要薑絲架乍 ﹗腸胃炎中，剛掟完鏢賽單拖食碗粥暖暖胃先 ﹗突然好想食田雞，田雞肉質又嫩又滑又彈牙 ﹗味道鮮甜好好味。魚腩啖啖肉，泛著淡淡河魚鮮甜味道，清爽美味。文哥休息轉黎另一位師父煲粥，硬係味道較淡、料又較少、質地又較稀呢 ﹗都係文哥手藝好好多。

豉汁排骨煲仔飯，好耐無食喇 ﹗突然想食，所以無預先打電話黎落定 order，最快都要等 15 分鐘架 ﹗熱騰騰送到，飯香非常，飯粒質感嚥韌又飽滿，略有飯燋，撈埋秘製豉油，滾熱辣好好味呀 ﹗排骨肥瘦適中，豬肉味香濃帶甜，咬落軟棉有趙口，最後成煲食晒，一粒飯都無得剩 ﹗

咸魚肉片排骨飯，熱騰騰出晒煙，飯粒飽滿乾爽又有微微飯燋，撈埋香甜豉油，好正 ﹗肉片滑溜，跟梅香咸魚混和連飯同吃，美味到不得了，味道非常配合 ﹗排骨完全唔肥又啖啖肉，味道香甜濃郁，超水準，好好味 ﹗加上尖椒、薑蔥作點綴，味道及香氣份外吸引。幾時轉左用透明膠盒呢？

柱侯牛筋腩河走蔥，招牌河粉無甩拖，棉滑河粉熱燙燙，特濃柱侯汁混入大量辣椒渣齊齊大手大手連湯帶粉掃入口，香甜味美濃郁刺激熱騰騰，好好味啊 ﹗牛筋味濃爽口滑嘟嘟、瘦瘦鬆化無渣加上濃縮柱侯味道，正。醉後好肚餓，靜靜閃出去食個宵夜先得 ﹗

淨牛腩河走蔥，近來魚滑換晒新碗，雖然比以前美觀又大隻少少，碗大有鬼用咩，用料又唔係多左，令到粉麵賣相差左，睇落好似水汪汪咁，師傅們要習慣一下落少啲湯呢。以依個河粉黎講，湯太多所以搞到好淡口，沖到腩汁淡晒。我都係鍾意以前用細碗，味道濃好多架 ﹗河粉保持棉滑，帶著大量湯汁特別好味，正 ﹗柱侯牛腩依舊入味又軟棉，保持高水準，招牌菜無得輸 ﹗

淨牛腩伊麵走蔥，伊麵超強既索湯力配上柱侯牛腩絕到不得了 ﹗濃郁腩汁湯底已滲進每條伊麵之間，已染得啡啡的，一咬爆汁 ﹗麵蛋香味夾雜牛腩清甜，再被辣椒油牢牢抱著在舌尖上打滾，好食到難以形容 ﹗必須要連麵連腩大啖啜方能感受到無比辛福及美味 ﹗

淨牛腩麵，湯汁太多喇麻，汪洋大海一般。招片牛腩那有輸的可能，鬆化味濃無渣無筋，用麵捲住黎食如虎添翼，美味 ﹗剛剛 Bali 返港一落機返屋企掉低晒行李就即刻撲出黎食碗熱辣辣湯麵先啦 ﹗

淨牛腩撈粗麵走蔥，保持高質美味，柱侯牛腩軟棉入味，半肥瘦好好食。粗麵濕左少少，未算過腍，滿意。全部消滅，一條麵都無剩，飲埋碗熱辣辣香濃魚清湯，舒服晒。

淨牛腩撈麵走蔥，黎魚滑幾乎次次都係食佢既柱侯牛腩，一味走天涯。魚湯鮮甜美味，浸住生菜更好飲。幼麵夠晒爽彈索索聲，帶著腩汁辣椒渣好味道 ﹗牛腩鬆化軟棉，不乏肉汁，跟幼麵齊齊食特別滋味。

及第麵走蔥，食牛腩食到好悶呢，搞搞新意思黎個及第麵。跟及第粥既質數不惶多讓，同樣美味有水準，配麵跟辣椒油都好好食啊。粉腸彈滑、豬潤爽而多汁、豬肚甜又脆，一大束幼麵夾上內臟同吃亦十分滋味有趣 ﹗掟完鏢賽差不多十二點先食晚飯，好肚餓呀 ﹗空肚飲酒，已飲到斜斜地，搞到掟不出水準來 ﹗

鮮牛肉麵走蔥，無奈地只能提供粥檔既滑牛，乸到滑啫啫又腍滋滋呢，不喜歡。黎親都係牛腩，食到好悶啊 ﹗試試牛肉唔難食，幼麵搭上辣椒油及香甜湯底連牛肉倒入口，都好味地一般啦。

今晚飲得太醉了，啤酒、紅酒、whisky、shooter、等等，一定要食下熱野散一散酒氣清醒一下，胃都舒服好多。飲到爆醉好肚餓，突想食煲仔飯囉 ﹗粥皇文哥既背影 ﹗So sorry，我只會宵夜先叫粥食架乍，雖然魚滑既生滾粥係我食過最好味既，仲可能係全新界最有水準既生滾粥。

無食晚飯就一個人飲左一支半白酒，個胃痛到火燒，有灼熱感覺，唯有食碗粥返屋企休息喇 ﹗贏左第一場 pool 對偉哥球賽就已經飲到胃痛，第二場對阿 King 輸掉了，因為我飲太多？因為我胃痛？唔夠 luck 罷了。