十下火鍋

天寒地凍既香港，有乜好得過聚埋烚下烚下打邊爐！呢間新派懷舊風火鍋店喺社交平台好多人都試過，口碑唔錯，最特別既係佢地仲推出多款健脾開胃、養顏又有益身心既落重料湯底，完全顛覆咗打得邊爐好上火既固有觀念…… 咁湯底有咩可揀呢？白玉菊花、卜卜蜆煲、椰子燉雞、龍蝦鮑魚海鮮鍋……今晚同女伴嚟，咁就試下至「護膚美顏養生」既火瞳花膠魚肚雞湯底啦！ 侍應捧上既火鍋盛器成個舊式面盆咁，圍邊刻有花紋圖案，幾搞笑，仲話以前啲人就係用呢種邊爐，貪佢傳熱快，灼野食至夠High(押韻添！)好嘞！講返個湯底，成隻雞放湯、又有足量花膠、魚肚、火瞳、仿翅……味香濃又滋補！ 食物呢，今晚點了二人精選套餐，唔使諗、唔使慢慢揀……咁有咩食呢？大刀手切本地牛肉、牛白胸膀油(牛脂肪)、十下三寶滑、懷舊果皮魚蛋、流心粟米丸、醬爆瀨尿牛丸、爽滑鴨血、脆炸響鈴、寬冬粉和蔬菜拼盤，飲品點了洛神花茶。 建議一滾起先嚟飲碗頭啖湯，再落寬冬粉，跟著就可落肥牛、牛白胸膀油(灼8秒就食得，爽口唔肥膩)……再因應興趣灼下淥下……三寶滑係牛根滑、臘腸魚滑同蝦滑，有辣有唔辣，滑溜又彈牙。懷舊果皮魚蛋其貌不揚但魚味濃烈。流心粟米丸和醬爆瀨尿牛丸咬開饀料四溢