麺匠 真武咲弥 (已搬遷) 新店位置

約左朋友係灣仔食Lunch，苦惱緊食乜之際，突然傳來一片火光，原來呢間拉麵店用緊大火煮麵，見咁特別天氣又凍就不如試下啦。呢到主要得3款湯麵， 分別係，味噌，辣味噌，醬油。唔可以好似其他既拉麵店可以自己選擇麵硬度 同配料份量 。同朋友都叫左味噌， 但佢怕唔飽就加底同一隻塘心蛋，但我覺得普通都夠份量。先講個湯，經過炙焰加持，熱辣辣，飲一啖成身暖晒 ，燒過既油脂香味更出，能夠同味噌互相調和 味道唔會好鹹；而個麵彈牙，份量多，夠粗易掛湯；至於叉燒切得比較薄，所以欠缺口感，亦都令到味道唔夠濃厚，比湯頭完全掩蓋。總結而言，拉麵好出色，淨係個湯頭夠熱已經贏到大部分拉麵店。但有樣野唔係好欣賞就係要收加一服務費，因為連裝水都係自助，何來服務可言呢。