埠 (已結業)

一大朝早入左西灣河揾朋友打波，打完當然要醫肚，地膽朋友話有間日本野幾正，於是向海邊一直行，最後黎到碼頭隔離嘅埠。我地雖然係第一枱客，但都要坐第二排，第一排窗口位已經留晒位，好彩都望到海景，有自然光幾寫意。有午餐同散叫，太肚餓唔想慢慢睇，揀左午餐，包主菜沙律、茶碗蒸、味噌湯、白飯、甜品。先黎頭盤，番茄雪凍左，但又唔會硬晒同埋凍到牙痺，涼涼地配埋沙律醋好醒神，新鮮甜美。一凍一熱，跟住食茶碗蒸，剛出爐熱辣辣，夠嫩滑，但味醂落得唔夠，淡左少少。火炙將左口魚嘅油香逼晒出黎，入口即溶，齒頰留香，送飯一流。烏冬熱到出晒煙，夠煙韌，蟹肉鮮甜，湯底清得黎夠晒味，全鍋配搭得好好，最後仲飲晒啲湯。牛扒冇煎得過熟，即使鐵板熱住，肉都仲保持到鮮紅，安格斯牛本身已有保證，配上蔥、椒絲、炸蒜同炸薯絲等日式鐵板燒配料，好香好惹味，炸薯絲非常好食。是日甜品係泡芙，一啖一粒，滿足！