船皇 (謝斐道) (已結業)

泰國菜入面對於佢地既粉麵情有獨鐘.今日趁住下午茶最後既時間黎食呢間係泰國有好多分店既船皇.又銅鑼灣地段價錢相當合理,賣$30-$50幾蚊一碗絕對足料.湯麵一共有4款麵底做選擇點左2碗麵都以河粉做底,河粉闊身質地滑得黎又可以掛上湯汁.2碗麵湯底都用牛骨湯而內裏帶少少牛骨湯味,湯濃得黎又唔會好咸食完唔會口乾,仲見到牛骨渣.配料有炸豬皮,炸得鬆脆唔油膩,牛丸豬肉丸細細粒又彈牙,牛腩夠淋吸晒牛骨湯味.泰妹雞翼用單邊雞翼食起黎幾放便,炸得夠脆味道用左辣醬醃得好夠味.春卷一口細細舊內裏仲有蝦肉同多椰菜,外脆內軟.