魚滑粥粉麵茶餐廳 (已結業)

忙左成日好鬼餓，晏晝只係食左少少粥少少炒麵，放工即餓住衝返大埔，好想食個熱辣辣既飯，就吔個煲仔飯啦，想食好啲，就餓多陣啦 ~咸魚肉片排骨煲仔飯，勁正既霉香咸魚、排骨肥瘦適中、啖啖肉。比起以前啲肥膏骨頭無肉食好左好多，唔通老細睇到我啲食評？﹗肉片好滑，非常入味。如果無特別指明，一般師父都只會煲十五分鐘，飯較濕及只有一點點飯燋。所以一定要要求乾身，咁會煲上約廿五分鐘，飯更香仲一粒粒乾身，好有口感。有飯燋，仲勁有飯燋香味，正 ﹗甜豉油都好滿意，雖然未到最 top 既境界，仲有空間提升 ﹗白烚菜芯配蠔油，莖部有少少渣，葉部都尚算鮮嫰。我最愛吃最頂頭 1/3 部份，超嫰，好味 ﹗