逸豪軒 (已結業)

呢間酒樓岩岩新開張，見到佢個餐牌有優惠，有好多海鮮都做緊大特價，好抵食，就走入去幫襯，發現水準都幾高，好值得捧場！入去點了條一斤重游水東星斑，原本諗住清蒸，佢地叫我試下加新鮮蜆肉和蝦乾浸湯，再用鹹菜調味，做一道「蜑家佬湯浸東星斑」！不久就新鮮滾熱辣送到，這道菜吸收鮮乾海產的精華，東星斑更加鮮美，啖湯好甜，果然冇介紹錯！另一道「菌皇醬油雞」依家做緊特價，半隻$50、一隻$98！佢地話用雙璜生抽同好多種藥材去浸雞，再以上湯煨好雜菌。呢隻雞雖然做緊特價，但冇偷工減料，雞肉好嫩滑，好味！呢餐飯水準的確係意料之外的高，以後去土瓜灣，又多一個食好野o既地方！