漁正居酒屋 (已結業)

居酒屋絕對係同朋友仔gathering嘅首選地方，小店主打多款刺身、串燒、炸物同小食，裝潢以木系為主調，周圍都掛滿日本風嘅海報，仲有類似榻榻米嘅座位，好似去咗日本咁呀🙈前菜有自家製鮮魚湯，魚味濃郁，清甜可口，熱辣辣好暖胃～ 田樂豆腐有四小件，外脆內滑，面頭再塗上一層薄薄嘅味噌調味，新奇又惹味😋 菜品包括苦瓜炒豚肉同五目炒什菜，苦瓜甘甜、豬肉片嫩滑、什菜清爽，兩款都係簡單又有營養嘅日式家庭菜！個人推介味噌珍珠蠔野菜鍋，湯底天然，鹹度適中，珍珠蠔鮮美滑溜、野菜份量十足，吸滿湯底，新鮮又鮮甜！雜錦天婦羅拼盤都唔錯，兩件海蝦配上四件菜品，炸衣夠薄，唔怕熱氣～ 另外仲有幾款一夜干，本身以為係乾爭爭一片片嗰啲，點知原來係原條上！會話必點燒馬友魚，外皮酥脆，食落啖啖肉，要encore🤭 而魷魚燒完都保持到個濕潤度，可以一試～ 串燒類都有好多選擇，個人習慣每次到居酒屋都會叫荔枝豚肉卷，清甜嘅荔枝中和咗肉嘅油膩感，兩者互補，令人難以拒絕🤤 鮮雞全翼大大支，嫩滑多汁，好有驚喜！大蔥雞柳、日本大蔥同雞軟骨都唔錯，整體性價比幾高！