CURATOR Art & Café (已結業)

新K11開左咁耐，今日終於有時間過嚟行下，自從3D打印出左，3D打印咖啡都好hit，今日終於有機會試下。呢成個環境都好文青，除咗有啲畫，仲有啲紀念品買下。我地嗌左個聖誕餐，應下節，提早過聖誕。一個係烤南瓜田園沙律，佢除咗烤南瓜之外，仲有番石榴，核桃同芝士，再加埋檸檬汁，酸酸甜甜好開胃。另一個係煙三文魚凱撒沙律，除咗煙三文魚呢個主角之外，仲有培根粒同芝士，仲有脆卜卜嘅麵包粒，都好fresh。主菜我哋揀咗香煎慢煮三文魚扒，個三文魚都好滑，因為佢唔會煮到十成熟，再配埋菠菜，黃色翠玉瓜同三文魚子，份量岩岩好。另外一個我哋就嗌咗豪華豬肉卷配健康穀蔬，呢個穀蔬代替左米飯，低糖啲，纖維又多啲，同個豬肉卷形成左個對比。依個豬肉卷都好冧，好夠味。甜品就係聖誕節慶布甸，雖然寫住係布甸但其實係紅酒燴梨同英式蛋奶醬。紅酒燴梨幾好食，完全冇酒味，但係梨嘅口感冧冧地，帶微甜。而佢個英式蛋奶將我個人認為比較甜，有啲似嘉應子巨大化。最後道到重頭戲嘅3D打印咖啡。因為我係唔飲咖啡，所以好彩佢有得揀朱古力底，我自己就揀咗呢個花花圖案，朱古力唔會太甜。你男朋友就飲咗梵高名作嘅咖啡，佢話返我聽個咖啡都好好飲。