心夜來潮 (已結業)

心血來潮想食潮州嘢，之前經過南記見到一間新開的潮州小菜館，喺旺角地鐵站行2分鐘就到。今日一於同老公來試吓，好彩預先訂咗位，人頭湧湧，如果唔係就有排等啦。餐牌有好多特色潮州菜，可惜兩個人唔食得多，但我最喜歡的滷水就非食不可。醬鹵雙拼～ 豬腸拼豆腐。豆腐和豬腸的滷水味香濃 入曬味但又唔太咸。豬腸好軟熟 洗得好乾淨！豆腐好滑溜 yummy~潮汕砂鍋粥，特別之處在於有得自己揀配料，豐儉由人。配料好多選擇，肉類、海鮮包羅萬有。我們揀左花甲、鮑魚、雞件。即叫即煮，出嚟嘅時候熱辣辣，粥底軟綿綿，雞件同花甲好足料，鮑魚就每隻計錢。花甲和鮑魚都好鮮甜，時間控制恰到好處，所以有咬口得來唔會太老。配上蔥花 芹菜 食落去更加香。豬油渣炒菜心 豬油渣香口～ 菜心爽脆鮮甜 送粥一流！椰樹牌椰子汁 香滑又夠濃 凍飲正！下次多點人去食 可以試多幾樣 冬天食砂窩粥 應該會好正！