一鼎‧台式火鍋 (將軍澳中心)

营业中

休息中

觀察到呢間新餐廳開張左一排人流都唔錯，趁住仲有新店優惠就揀咗個中價餐試吓。任食邊爐唔使講一定狂食肉，一坐低就狂攻澳洲200日穀飼牛，比想像中好食有牛味，係中高價牛味，肥瘦適中，嚟咗幾round都保持到質素。澳洲純和牛係意外之喜，雖然係低一個Level嘅肉但都好唔錯，比穀飼牛肥少少更軟滑，夠大塊啖啖肉。 丹麥梅花肉同牛比都毫不遜色，厚身啲有肉香，即使唔係個餐最貴嘅肉，都吸引到我encore。鮮墨魚難得地好厚身同真係有墨魚鮮味，有平時打冷食到嘅水準。熟食炸嘢都好唔錯，午餐肉、鹽酥雞同台灣腸都水準以上，炸午餐肉唔會粉，狂食咗幾舊。驚見可以任叫店外賣緊廿幾蚊杯嘅台飲，冬瓜牛乳茶奶味好香、唔會太甜，又有冬瓜香味，就算俾錢買我覺得都值得。 百香果三重奏夠味得來唔會太甜，底下仲有粒粒百香果同椰果，好足料。