潮牛莊火鍋 (已結業)

星期六返半日無咩做，順理成章都係上吓網，睇下放工食咩lunch!!搵到呢間主打騸牯牛既火鍋店，呢度以一人一鍋為主，晚市一人鍋湯底都只係$32-48。Lunch供應粉麵飯外，仲有$98-138既一人火鍋套餐，已包湯底，肉一碟，蔬菜一份，連餐飲，都幾吸引!  見鄰檯點既清湯牛腩唔錯~ 點了一份，湯頭同樣有濃郁肉味，香而不膩，入口順喉雖然我地只係點左最普通既牛腩，而非崩沙腩、爽腩既部位，但牛腩都係靚既，有筋膜包住。帶點脂肪入口更滑，食牛腩我都係中意有少少肥!! 我點既海帶清湯鍋，入面有海帶、馬蹄、南瓜，非常清甜! 配埋用橡樹果餵飼既西班牙黑毛豬梅肉， 肉質十分嫩滑，輕灼數秒已經食得~ 加上清甜既湯底，唔需要點醬油，食起嚟油花部份都係香滑鮮甜既~ 其他配料例如魚皮餃，餃皮薄有魚味，咬下有肉汁流出。手工津白鮮肉餃，口感清爽，不過胡椒略為重手。　蔬菜款式 分量都真係幾多，有紫生菜、娃娃菜、秋葵、唐生菜、珍珠筍等等..樣樣都好新鮮~就連比較普通既菜心，都提供最嫩既一節，特別爽嫩~ 最後餐飲加$8點左熱竹蔗茅根水，好清甜滋潤，有住家煲既味道!