山海。さんかい (已結業)

平時嚟親屯門都係去市中心，但係今次朋友竟然約我去卓爾居，話有驚喜喎。原來係開咗一間好骨子嘅日式餐廳。前菜我哋揀咗個玉子燒，佢個玉子燒好多層，夠晒厚，又甜甜地，唔錯。然後我哋叫咗四件壽司，分別係鰻魚，帆立貝，三文魚腩同埋牡丹蝦。佢呢度嘅蒲燒鰻魚都幾大片，而且個醬汁唔會甜唔到蓋過晒魚本身嘅味道。而佢個帆立貝都好新鮮，好鮮甜。至於三文魚腩亦都好夠肥美，火炙嘅情況下都食到魚油嘅甘香。另外我仲叫左件好特別嘅本鮪面頰，即係魚嘅面珠墩，咁大塊面珠墩到底條魚要有幾大條。職員話係包住紫菜嚟食，佢個口感比較似和牛，真係好香，入口即溶。然後我哋仲叫咗個炸軟殼蟹牛油果卷，軟殼蟹都揸得唔錯，唔會太厚粉或太硬，配埋牛油果又可以解膩，感覺清新好多。然後我哋仲叫咗個日式燒原隻魷魚筒，佢個魷魚燒到啱啱好，唔會太乾唔會太老，送酒真係一流。然後我哋仲叫咗個清酒煮廣島蠔，佢啲蠔真係好鮮甜，用清酒煮完全帶到廣島蠔嘅鮮味。最後我仲叫咗個茶碗蒸，但係佢個賣相同傳統茶碗蒸好唔同，佢好似個布甸咁，又滑又彈，加埋啲蟹肉同三文魚子，個賣相真係好吸引。