合記茶餐廳 (已結業)

車仔麵真係長做長有，已經 13:00 一放飯即刻走落去，但已經十幾個排緊隊！算數，最緊要快，最多咪又即食麵！近來市道真係咁差？個個搶住食經濟車仔麵，仲越來越墟撼。太陽蛋火腿雞扒出前一丁，嘩！塊雞扒放左幾耐架，乾硬鞋又帶酸宿味，琴日剩低？雞肉死實無靈魂仲要帶酸味，聞得出我最驚既隔夜嗅雞味！我話晒都係 VIP 喎！就算係咁難食我都食晒，真係肚餓！師傅咁耐以黎煮出前一丁麵係有幾板斧既，所以我食足咁多年。滾熱辣噴晒煙，完全覺得係有鑊氣添呢！麵條彈彈又爽口，曲曲既麵條掛湯力特別出眾，每啜一口都嚐到甜美濃郁湯汁！太陽蛋，我喜歡浸浸熱湯等佢溫度再暖一點先成隻啪入口，溫度暖和一點，蛋黃味更濃更甘香。火腿大路無投訴，如果係叉肉就恐怖喇！煎定晒，仲要勁乾勁硬勁油，色香味都唔掂。