魚滑粥粉麵茶餐廳 (已結業)

朋友放假，相約食個飯、飲野打枱波。咁就酒吧對面間麵檔啦，夠近又快，底食又好味 ~腐乳通菜，夠新鮮爽口，灼得剛好，已足夠。淨牛腩及第河粉走蔥，都話走蔥咯，又唔記得呀。全部豬內臟乾淨新鮮，粉腸夠粉口又彈牙無苦澀味。豬潤雖未靚到起沙，但鮮甜爽口，豬心豬肚亦都好鮮味。柱侯牛腩當然保持一定水準啦，腍滑入味。河粉煮得夠耐，又棉又滑，唔會好似其他麵檔咁硬身。咸魚肉片田雞煲仔飯，係上等既霉香咸魚，入口即熔，正。最衰依度唔賣肉餅，如果唔係仲好食。肉片出奇地嫰滑又醃得好入味，豬肉味濃，田雞肉鮮美味。跟師父要求煲夠廿分鐘以上，飯乾身、嚥靭又香口，撈埋清香甜豉油，好好味 ﹗雲吞淨牛腩撈粗走蔥，粗麵爽口滑溜，烚得軟硬適中。腩汁香濃，撈麵一流，已經唔洗再加蠔油添味。生菜浸清湯上，熱辣辣，新鮮灼菜，爽口又充滿水份。雲吞大眾化口味，無咩特別，蝦爽豬肉味濃。淨牛腩伊麵走蔥，伊麵煮得恰到好處，嚥嚥靭靭，唔會過腍，又唔會發脹，口感一流。柱侯牛腩炆得入味鬆軟，正 ﹗香濃腩汁湯底，真係忍唔住要飲多幾啖。