漁正居酒屋 (已結業)

第一次黎食，餐廳格局、門面裝修及燈光好有地道日本居酒屋感覺，食物質素都幾好，服務員好禮貌，值得推介。室津蠔$18/隻真係好抵食，肥美鮮甜, 好有蠔味。池魚刺身賣相好高級精緻，服務員俾左一款專食池魚既醬汁，少少酸, 但提升魚既鮮甜味，魚本身都好新鮮。三文魚刺身新鮮，切俾我都既部位好有油香，鮮甜好味。活赤貝刺身即叫即開，當然鮮甜，無得輸。北海道鮮帆立貝壽司一望就知係手握壽司，握得好扎實，一口放晒入口，壽司飯既溫度加上帆立貝既鮮甜度，好好味。柚子汁牛脷沙律牛脷好軟淋，柚子汁配沙律菜，味道好開胃清新。海中蝦天婦羅天婦羅脆漿不會太厚，熱辣辣，外脆內嫩。自家制厚燒玉子溫度暖暖地，玉子甜甜地又濃厚蛋味，味道唔錯。沃川黑醬油拉面黑醬油湯底順滑濃郁又夠晒熱，面條好煙韌，叉燒半肥瘦，好暖胃好味。煎豬肉菜餃子餃子配拉面，簡直絕配，皮薄餡多，餃子煎得好香脆，但不會太油膩。大蔥雞柳食落就知係日本雞肉，有佢獨特既雞肉香味，配埋大蔥一齊食，好夾好味。牛舌串厚切口感好爽，濃厚牛舌味，仲好油香好惹味。其實都食左好多野，但價錢都好相宜，勝價比好高。