반찬앤쿡 Banchan and Cook (東薈城名店倉)

营业中

休息中

有日老公話想入東涌outlet血拼，勞動之前梗係要餵飽自己。見到呢間餐廳裝飾幾靚，有好多人排隊，所以就試吓。我哋首先叫咗烤牛肉蛋包飯，職員喺我哋面前界開個蛋，蛋好滑，但我最欣賞係佢個烤牛肉，個汁甜甜地，好好食。蜂蜜無骨炸雞，我自己非常推介！喺香港要食到好味嘅炸雞好困難，呢度嘅炸雞夠香脆，肉又夠嫩滑，加咗蜂蜜，真係超級好食。烤雞卡邦尼年糕，好有創意嘅菜式，佢個汁煮得好creamy，年糕好煙韌，一試難忘。最後點少得甜品，我哋試咗韓式雜莓牛角包窩夫。質感好特別，好脆，好香玉桂同楓糖味，如果有雪糕就好喇！整體嚟講，佢啲嘢食冇樣係會令人失望。而佢嘅嘢飲亦都好出色！欣賞士多啤梨紅桑子梳打唔會太甜，夏天飲一流。至於濟州鮮奶綠茶同樣好有驚喜，鮮奶同綠茶拎到平衡點，兩隻味嘅香味都好突出。