桂花小幸 (將軍澳廣場)

营业中

休息中

呢日同個friend去將軍澳廣場閒逛，行到咁上下又到食晏，咁啱見到呢間食店佈置得幾特别幾雅致，心諗不妨試一試。店名叫桂花小幸，裝修風格滿滿台灣文青小食店 Feel，坐低叫番幾款台式食品，飲杯珍珠奶茶，驟然有種置身台灣嘅感覺，唔錯，唔錯。睇吓餐牌，呢度以台式美食做主打。咁又点可以唔叫番碗牛肉麵呢！點咗個三盛牛肉麵，配紅燒湯底，麵一上來，賣相不俗，先呷一口湯，香濃中帶點微辣，所謂三盛，即係腱心牛肉、牛腩、牛丸，不過今日冇牛丸，店家用咗花枝丸代替，麵入面仲配咗紅、白蘿蔔，麵質煙韌有咬口，味道鮮美，真係冇揀錯。😋同行友人就order咗個胡椒豬肚湯定食。上枱一睇，份量足，夠抵食。湯頭微酸微辣好醒胃，豬肚有咬口，配埋中式芹菜、鹹酸菜同娃娃菜，好好送飯。另外我哋仲配咗幾款小食。桂花鷄翼，炸得香脆嘅鷄翼，配上淡淡桂花甜漿，味道不俗，别具特色。涼拌黑醋茄子，賣相精美，酸酸辣辣，非常惹味。再加一碗紫菜魚丸湯，真係夠晒台灣地道風味。最後歎番杯我至愛嘅香濃珍珠奶茶，今餐真係食得圓滿又滿足。