CHEF STAGE de Eddy Chu (已結業)

上次同朋友食o個陣係晚市，今次o黎品嚐下午茶。上次o黎o既時候焦點自然聚落o係維海夜色o既迷人景緻，然而原來日頭o既景觀又另有一番氣象，向九龍公園o個邊會望到大片綠油油o既園林，周不時又有d 雀仔飛過，食餐飯都心曠神怡d。店員好有禮貌，同埋好細心咁同我介紹個menu。有一款係普通茶餐，而另一款則係我最後揀o左o既升級版，可以試埋個海鮮拼盤($128 免加一)。拼盤以冰底奉上，生蠔入口即溶，鮮花螺同聖子都幾爽口，日本帶子鮮甜嫩滑，鮮蝦就肉質結實。佢附o左兩隻醬汁，侍應提到橙色o既係泰式醬，而綠色o既係鮮草醬。兩隻都微辣，泰式醬o既味道似冬陰公，而鮮草醬就帶有強烈o既越南風味，兩者配上海鮮都幾夾，有助提鮮。蒜蓉包同三文魚雙蛋一齊上，如果唔鍾意三文魚都可以揀火腿。蒜蓉包o既蒜香唔錯，而片煙三文魚無想像中咁鹹，實屬健康之選。主食我揀o左份香草雞扒配意粉，個人尤其幾鍾意呢隻扁身意粉個口感，軟硬度亦都拿捏得宜，係略嫌個湯底重味o左少少。嘆杯咖啡，慢慢坐下，享受番下慢活o既生活。