La Casa Burger & Pasta (文咸東街) (已結業)

而家食晚市冇得堂食，諗住食burger會方便啲，嚟咗呢間係上環嘅漢堡包店。見佢又有二人餐，同埋加啲錢又有手工啤，於是叫咗都幾多嘢。兩個漢堡包揀咗經典芝士漢堡同薄切西冷漢堡。佢地用嘅包有啲似豬仔包，但又唔會係好韌嗰啲。芝士漢堡配番茄生菜，係我最愛嘅漢堡包組合！西冷就好足料，真係有好多片，而且都好香同juicy，感覺好抵。其他小食有炸雞翼，薯條同肉丸。薯條就比較冧，雖然多數人鍾意脆，但冧嘅就啱我。雞翼都唔錯嘅，唔係得啲皮炸到大大嚿嗰啲。肉丸就一般，我覺得多啲汁會好啲。