影片
更多
2021-04-21
5988 浏览
有一排好钟意食马来西亚菜、新加坡菜，尤其系叻沙同埋咖央多士，做个一轮资料搜集，见到依间嘅咖央多士同叻沙非常吸引，bookmark左好耐之后终于去试。叻沙系国民美食，无分早午晚，就好似香港既云吞面咁，个个马来西亚人、新加坡人都好钟意，不过大家成日食叻沙，其实又知唔知叻沙既来源同历史呢?叻沙最常见系新加坡同马来西亚，不过对于边个先系真正既发源地其实无确实既答案。叻沙随左唔同地方同族群会有唔同既版本，好似系马来西亚中部、南部同新加坡既叻沙叫咖哩叻沙，而大家平时好常听到既娘惹叻沙其实系咖哩叻沙既主要形式，甚至有历史学家话娘惹叻沙系叻沙既最雏型版本。咁娘惹两个字究竟点解? 系15世纪时，中国移民同东南亚土著居民联姻之后，生出黎既女叫做娘惹，如果系男仔就叫峇峇，华人既饮食习惯慢慢同当地饮食文化结合一齐，当时既妇女会将D香料同椰奶加入中国既面条入面，所以可以肯定叻沙系由马来人、华人同娘惹唔同文化结合出黎既食物。由于马来西亚同新加坡共享好多共通文化，两地系咖哩叻沙做法上其实分别唔大。呢间新加坡菜系2018年开业，由来自新加坡既大厨主理，因为全日净系卖娘惹叻沙、干叻沙同虾面，曾经比人睇死好快会执笠，点知
有一排好钟意食马来西亚菜、新加坡菜，尤其系叻沙同埋咖央多士，做个一轮资料搜集，见到依间嘅咖央多士同叻沙非常吸引，bookmark左好耐之后终于去试。叻沙系国民美食，无分早午晚，就好似香港既云吞面咁，个个马来西亚人、新加坡人都好钟意，不过大家成日食叻沙，其实又知唔知叻沙既来源同历史呢?
叻沙最常见系新加坡同马来西亚，不过对于边个先系真正既发源地其实无确实既答案。叻沙随左唔同地方同族群会有唔同既版本，好似系马来西亚中部、南部同新加坡既叻沙叫咖哩叻沙，而大家平时好常听到既娘惹叻沙其实系咖哩叻沙既主要形式，甚至有历史学家话娘惹叻沙系叻沙既最雏型版本。咁娘惹两个字究竟点解? 系15世纪时，中国移民同东南亚土著居民联姻之后，生出黎既女叫做娘惹，如果系男仔就叫峇峇，华人既饮食习惯慢慢同当地饮食文化结合一齐，当时既妇女会将D香料同椰奶加入中国既面条入面，所以可以肯定叻沙系由马来人、华人同娘惹唔同文化结合出黎既食物。由于马来西亚同新加坡共享好多共通文化，两地系咖哩叻沙做法上其实分别唔大。
呢间新加坡菜系2018年开业，由来自新加坡既大厨主理，因为全日净系卖娘惹叻沙、干叻沙同虾面，曾经比人睇死好快会执笠，点知变左人气长龙店，仲掀起左食叻沙既热潮。Rampah系马来语，解香料既意思，一般星加坡、马来西亚做法都系混合香草同香料作为香味既基础，而呢间Rempah Noodles系用香草同香料炮制出自家独门秘方，同时展示融合传统同新派既煮法。虽然佢个位置唔算近任何地铁站，喺湾仔区但地铁站行过去要起码6分钟，系金钟站行过去又系6分钟，但每次经过都见到有人排队。
第一次去𠮶时系星期五夜晚，见到排队嘅人唔算多，谂住排到队就食到，点知排到前面仲有两个人𠮶时，侍应行出嚟讲话叻沙已经卖晒，果次唔成功食到，之后去咗同区嘅bibi & baba，冇期望过点知系非常好食，但bibi & baba咩都有，唯一一样冇嘅就系咖央多士，所以想去依间Rempah Noodles食咖央多士嘅念头一直仲喺度。
之后第二次食，为左一定要食到叻沙同咖央多士，就选择日头去，星期六大概下昼一点半去到，有人龙但系唔算人多，等咗大概10至15分钟就入得。
餐厅既门面就咁睇仲以为系CAFE，黑白格仔地砖、云石枱、落地玻璃既装修，简洁时尚，开放式既设计，而且餐厅采光度高，所以吸引左唔少人黎打卡，最厉害系行过就会闻到好香虾面既味道。餐厅嘅左右两排系面向墙嘅位置，中间有一张云石大枱，枱上摆左鲜花同一啲东南亚作者著作，摩登带几分文青气息。近门口会有隔住玻璃嘅两张枱，一张系室内面向街既，另一张就系对住，但就系室外位，如果唔介意坐室外位，排队应该会快啲入到。
餐厅嘢食唔多，屈指可数，贵精不贵多，Menu上净系见到三样嘢食，娘惹叻沙、干叻沙同虾面，嘢饮就只有四款。除咗店员俾你嘅Menu之外，喺墙上有块黑板，会有一款小食叫金杯，另外就系甜品咖央多士。餐厅冇好多嘢食，但已经足够令好多人山长水远排队一试。
叻沙、咖央多士都系我嘅主要目标，比起其他餐厅佢有特别嘅干叻沙，所以都叫咗黎试，而金杯因为上次食过bibi & baba觉得好特别好食，所以叫左试比较下。落完单就会见到餐厅净系收现金，而且张单上面会有餐厅嘅wifi password。
店员会提供柠檬水，就算唔特别叫野饮都足够清口解腻。
-
1️⃣ Kaya Toast 咖央多士 💰38（👅: 9.5/10）
咖央多士
$38
106 浏览
1 赞好
0 留言
外表同平时内馅系偏啡色嘅咖央多士唔同，佢嘅内馅系绿色，颜色似牛油果，因为佢系加左新鲜班兰叶嘅酱。另外佢唔系一般咖央多士咁，净系系多士入面抹上薄薄既斑兰或者咖央酱，而系将斑兰叶同椰奶打成CREAM，令到CREAM充满系香脆既多士之间，超级饱满。
多士烤到金黄色，面包焦香唔强，但非常松脆可口，外脆内软，唔会硬邦邦，食落系热辣辣，内馅咖央酱系非常之厚同creamy，口感有啲似吉士同雪糕中间，食落小小冻，小小似食雪糕多士，一咬落去咖央酱咇哂出嚟，入口轻盈顺滑，带小小斑兰香，热辣辣既多士配上小小冻既咖央酱，冰火交融，系一啖接一啖嘅满足感，因为唔会觉得过甜，食完又唔会觉得好heavy，香甜不腻，令人欲罢不能，就算一个人食哂成份都不为过份。虽然佢系冇好似其他咁加块牛油既咖央多士(例如好似苏妈既牛油咖央酱)，但味道已经胜过好多牛油咖央多士，而且加左牛油可能会比较HEAVY，就咁班斓咖央食落就清新，但咖央多士如果唔系趁热食应该会差好多，因为面包会冻左同比较硬身。
如果钟意食满满酱汁嘅咖央多士，呢件就最适合，甚至我觉得依个系我食过咁多个，最好食嘅咖央多士，因为有好多咖央多士个酱系唔够，或者味道唔够浓厚，要做到酱汁浓厚，就唔可以系两块面包夹埋一齐中间差啲酱就算，做法要好似依个咖央多士，将一块厚嘅面包入边嘅面包肉挑空再打成CREAM塞满多士入面，先可以做到酱汁比其他咖央多士更多更丰富。
-
2️⃣ Pai Tee 金杯 💰60/4件（👅: 8.5/10）
金杯
$60
143 浏览
3 赞好
0 留言
金杯有分6件同4件，因为有叫咖央多士所以浅尝4件。
金杯系一款非常受马来人欢迎既地道小食，的骰既金杯，外表好似烧卖，温度唔冻唔热，大细系一口可以食得哂，建议用手食，因为用筷子好似跌左上面既虾。外表炸到金黄酥脆，杯身炸得好薄脆，食落系干爽、唔会有油腻感。金杯内馅系红萝卜、沙葛、煎虾、香菜、豆干粒，食落口感丰富，酥脆既金杯，带点水份既沙葛，加上鲜甜既虾味，配合上面既芫荽同参巴酱，只系简单几种食材，但夹埋一齐，咸咸酸酸，带少少甜嘅脆口，带清新芫茜香，所有香味融合为一，爽脆味浓，开胃惹味，系一样好好既前菜小食。
-
3️⃣ Nonya Laksa Lemak 娘惹浓厚叻沙 💰98（👅: 9/10）
娘惹浓厚叻沙
$98
35 浏览
1 赞好
0 留言
首先讲汤底，呢碗既叻沙做法正宗，用上叻沙胆系用上干葱、南姜、黄姜、石栗、柠檬草、大蒜、辣椒等材料炒制，之后再加入鸡骨、猪骨汤同椰浆煮成叻沙汤底。
但对比起某D叻沙，呢间系唔落蛳蚶既叻沙，未食之前已经闻到好香，入口几creamy，浓稠杰身，不过我系香港有食过更杰身(鲗鱼涌 小娘惹)，系浓厚嘅椰香味，每一啖面同汤都系浓浓嘅味道，饮落有叻沙叶、椰浆既香味同咖喱香料既浓香，对比起小娘惹佢系椰奶味较重，但唔会成口都系油。而碗叻沙虽然系橙黄色，红油多但唔算好辣，辣度比预期温和，就算唔食得辣嘅人都可以食到，不过如果钟意食辣D叻沙既可能会觉得唔够喉。碗汤唔会好重味精，系咁饮都唔会话觉得太口渴，一路一啖面一啖汤咁食，甚至食完饮埋剩低啲汤都唔过分，因为碗喇沙汤都系真材实料咁煲出黎，饮完唔会觉得好腻。
面底系粗米粉，唔系传统既掺掺油面、米粉两沟，食落质地小小弹烟韧，比较腍身唔算好爽口个种，不过就算食到最后都无发胀到变好腍身。食厌左掺掺食呢个粗米粉，会有一啲惊喜同新鲜感，不过如果配上掺掺可能会更挂汤更入味，因为虾面佢系两沟而叻沙就只有粗米粉，如果有得自己拣更好。
至于配料有半只蛋、5片鲜虾肉、炸鱼片、豆卜、鸡丝等等，质素算正常，虾肉好细心拆晒壳得返虾肉。𩠌料系叻沙入面不嬲都系配角，不过鸡丝食落都嫩滑有鸡味、鱼片食落弹牙外皮好烟韧香口、豆卜依旧吸汤，系比预期中好食，香甜咸味俱全，略嫌虾肉食落虾味唔重唔够鲜味，同鸡蛋无蛋香。
汤、米线同𩠌料既比例岩岩好，成碗分量来讲我觉得正常，因为我唔算好大食，但大食嘅人会觉得呢碗叻沙偏细，但餐厅好在可以免费加面底，依样系其他餐厅好少见，但大食嘅人就唔需要好担心食完都唔觉得饱。
虽然佢系无蛳蚶既叻沙，有人会觉得唔够正宗，但我觉得百花齐放，呢间叻沙令我暂时忘记蛳蚶。
-
4️⃣ Dry Laksa 干叻沙 💰98（👅: 9/10）
干叻沙
$98
144 浏览
2 赞好
0 留言
系其他新加坡菜、马来西亚菜既餐厅都无呢个干叻沙，几特别所以叫左。
佢其实系一个捞面，不过唔系掺掺，而系银针粉底。银针粉食落爽弹，爽中带绵，而且非常挂汁。
特别既系呢个汤汁同娘惹浓厚叻沙既味道系唔同，初头以为只系浓同淡D分别但唔系，对比起娘惹浓厚叻沙混入椰浆同骨汤既喇沙，佢系店铺特调既叻沙酱，百份百无添加其他元素，原形毕露既味道。
干叻沙汤汁食落无咁重椰香味，比较重咖哩香，但甜甜辣辣既味道依然，食落浓稠芳香，辣香同椰香兼备，香气复杂具层次，依然好惹味，酱汁虽浓但不至于腻。虽然叫干叻沙，但其实汤汁系非常足够，一啲都唔干，份量够捞埋所有银针粉黎食。叻沙浓汁结合鲜虾、豆芽、鸡丝、鱼片、鸡蛋、香菜，合而为一，配搭平衡。
-
5️⃣KOPI/TEH 💰30（👅: 7.5/10）
KOPI/TEH
$30
57 浏览
1 赞好
0 留言
MENU上系KOPI/TEH 配炼乳，单上写既系Iced Milk Tea，其实无写错。
新加坡既野饮，每餐必备既就系水，而平时见到既TEH、TEH O、TEH C，其实系奶茶，而KOPI、KOPI O、KOPI C，其实系咖啡。TEH系奶茶，O意思系加糖，而C就系加糖又加鲜奶，KOSONG就系唔加糖唔加奶，最后BING系加冰。
除非你讲KOSONG，如果唔系基本上都会加糖，TEH、TEH O、TEH C分别就系加炼乳、加糖唔加奶、加鲜奶既红茶。
所以KOPI/TEH 就系红茶配炼乳，就好似香港既热走咁，用炼乳冲出黎既奶茶。
饮落唔算好甜，比起一般奶茶带多一重茶味香味，呢种系拉茶既味道，不过我系香港饮过更好饮既KOPI/TEH，所以呢杯唔算特别突出。
-
🌟食过香港唔少叻沙，呢度嘅叻沙绝对系有top3嘅水准，因为香港要揾可以饮得落、唔系味精、系真材实料嘅叻沙汤已经唔多，叻沙其实只要个汤做得好，面同𩠌唔需要做到好突出都已经好足够，因为每食一啖面或者𩠌都会伴随住汤。价钱算中价，质素差唔多既bibi & baba都系差唔多100蚊，唯独鲗鱼涌小店小娘惹70蚊食到一碗质素同份量都唔输既叻沙，但鲗鱼涌较远同埋只做午市，以湾仔金钟地段黎讲，100蚊碗叻沙唔过份。
因为同区有bibi & baba，两间都系有喇沙、虾面、金杯，食啲嘢好类似，不过我觉得唔同嘅系，bibi & baba 除咗叻沙、金杯，仲有其他好多小食、炆鸡、椰浆饭、甜品，同埋会有大家熟悉嘅拉茶同milo dinosaur，而呢间Rempah Noodles就独沽几味。味道质素来讲，我觉得两间唔差太远，两间嘅喇沙质素都类似，不过bibi & baba 会比较辣少少，而金杯质素都系类似，不过个人觉得bibi & baba 既金杯入口比较满足啲，可能入边嘅沙葛多啲，个人觉得就依两样嘢食黎讲，bibi & baba 会更出色少少，但Rempah Noodles就有佢冇既咖央多士。
如果我系好简单想食叻沙或者咖央多士，我会拣Rempah Noodles，但如果我系想食好多嘢、或者想坐耐啲、又或者系星期五晚想饮下酒，我会拣bibi & baba，因为bibi & baba好多酒提供，小食同主食嘅选择都比较多元化，而且最重要系bibi & baba唔会赶客走，基本上夜晚一坐低，都差唔多可以食到9、10点，但Rempah Noodles基本上八点可能已经食唔到叻沙，已经卖晒，而且边食边见到出边嘅人龙，就算店员唔主动赶你走，都有无形压力会想快啲食完走。
咖央多士食过几间，发觉其他几间咖央多士冇办法超越到呢间，一黎其他嘅咖央多士入边个酱冇打成cream，味道唔够浓厚，二黎其他嘅咖央多士酱唔够多，又或者系本身多士就咁两块面包，冇办法塞到更多既酱，所以话佢系香港第一嘅咖央多士完全唔过分。至于叻沙我觉得好难讲边一间系第一，因为有啲叻沙系重海鲜味，有啲系重椰香味，有啲叻沙比较辣啲，有啲就完全唔辣，各有所好，至少呢间会系我想食喇沙会谂起嘅三间其中一间餐厅。
-
👅味道: 9/10
🍴环境: 7/10
💰消费: $324 (服务费: NA)
张贴
