法國小屋

营业中

休息中

今次雖然係叫外賣，但係水準都係超哂班，拎番屋企同堂食無分別，明太子蟹肉意粉煮得啱啱好，彈牙有嚼勁，每條意粉都掛滿creamy嘅明太子醬，帶點微辣同鹹香，味道好濃郁。蟹肉好新鮮，撕成細絲，份量多到每啖都有蟹肉嘅鮮甜，食落好滿足。醬汁唔會太膩，仲有少少蒜香同香草味，提升咗整體層次感。望落似細份，但其實份量夠食，食完有種意猶未盡嘅感覺！🍝另外再叫左份小食，招牌千層芝士薯片真係必點！打開就聞到陣陣芝士同蒜蓉香，薯片切得厚薄適中，層層疊疊，焗到外層微脆，內裏軟綿。芝士醬好濃稠，滲入每層薯片，入口係滿滿嘅芝士香，仲有酸忌廉平衡一下，唔會覺得太膩。蒜蓉同香草嘅調味加分不少，食落好惹味，停唔到口！🥔甜品時間當然要試下玉桂蘋果窩夫！窩夫烤得金黃香脆，外層脆卜卜，內裏軟熟，咬落有陣陣牛油香。上面鋪滿蘋果片，煮得軟腍，帶點酸甜，配上玉桂粉嘅獨特香氣，味道好溫暖。仲有少少焦糖醬點綴，甜度調得啱啱好，唔會太漏，係甜品控嘅好選擇！🧇