第一郡 (已搬遷) 新店位置

木嘴發現深水埗真係幾多好野食，尤其係多地道小店。有睇開木嘴食評都知，木嘴特別鐘意呢類小店，既然呢D小店有勇氣抗衡貴到痴晒線既租金同埋步步進迫既連鎖食肆，木嘴雖然胃細影響力更細，但都絕對會大力支持。今次又黎到深水埗搵食，一試呢間出名又抵食嘅越南野。間野就好細間得果幾張枱，一眼睇晒，所以都真係唔好預坐得舒服喇，有位坐唔使排隊都要還神。一場黎到，就當然要試下呢度既招牌蕃茄蟹膚湯濛同牛油果沙冰。湯濛非常足料，有菜有豬紅有豆卜，大大舊蟹膏同蕃茄。湯底酸酸地好開胃，幾唔錯。不過舊蟹膏大舊就大舊，但就無想像中咁好食，可能因為蛋味太重，似食蟹味既蛋多過蛋味既蟹。至於牛油果沙冰好香滑，岩晒鐘意食牛油果既木嘴，但就唔太冰，飲完又自我感覺良好覺得自己健康左。另外仲叫左個芒果糯米卷，芒果好大舊同唔酸，好味，不過真係好飽。總括黎講食物唔錯，料亦充足，亦睇到佢既誠意。識食梗係搵地道小店食，木嘴雖然出晒名係味覺失靈，但都知道呢個大道理。