芝加哥串燒酒場 (明雲閣)

放假入元朗玩下, 行下商埸, 悠悠閒閒放下假真係好寫意。夜晚再食埋食或者坐係酒吧飲下酒傾下計, 就真係爽了。去到明雲閣附近都好多餐廳食肆, 呢間位於金祥坊地下嘅一間酒吧, 新開且門面耀目嘅酒吧, 外牆設有橫額般大小的電子螢幕, 火光熊熊配上大魔王的畫面, 當場比佢吸引住啦。場內燈光昏暗, 大電視放於全場中央多眼處, 大約可容納25-30人的小小空間, 幾有氣氛!坐抵叫兩杯野飲下先, Happy Hour 時間, 叫一杯GlaBlanca San Mihuel 生啤 ($75) 一杯Peach mojito ($89)。生啤即卙, 正呀! Peach mojito裝飾得好靚, 就連調酒師自己都要幫佢影相呀! 杯酒有甜甜既少少桃肉, 加薄荷葉, Rum酒, 梳打, 青檸及蜜糖, 酒精味唔算濃烈易入口, 真係唔錯。每枱客坐低都有一大杯花生, 話時話, 啲花生好香脆好好食喎!餐牌上每項串燒均附有圖片, 近百種選擇, 有牛、豬、鳥、蔬菜、海鮮、佐酒和羊肉類別, 睇落樣樣都好吸引, 款款也想品嘗一試, 攪到我地都諗咗好耐, 心大心細唔知食咩。除串燒外更有前菜及主食, 任君選擇, 而且價錢有平有貴。