喜多嬉牡蠣屋 (已搬遷) 新店位置

今次去到中環食任食牡蠣放題，牡蠣由日本自設養殖場直送，貨源新鮮又高質。放題分為60同90分鐘，可以任食牡蠣刺身、蒸牡蠣、蒸帆立貝、串燒、主食同飲品。我地一於食豪啲，揀咗90分鐘放題，可以任飲任食1.5小時，放題更贈送一客喜多嬉九品，包括有日本直送象拔蚌刺身、二色燒活白鰻、日式漬物、手工月見汁燒鳥串、喜多嬉牡蠣茶漬飯、天婦羅秋葵、天婦羅紫蘇藥吞拿魚蓉、喜多嬉牡蠣刺身同時令沙律，一次過食勻9道前菜。輪到食主角牡蠣刺身喇！牡蠣刺身夠曬飽滿，還加咗土佐醋啫喱，可以突出鮮味之餘，又可以開胃解膩！除了牡蠣刺身外，仲有原隻即蒸牡蠣同帆立貝，夠晒原汁原味，牡蠣肉質鮮甜爆汁，再配上3款醬汁，食出不同滋味。食完牡蠣之後就點咗啲幾款串燒，有燒鳥大腿肉串、燒鳥雞心串、燒墨魚仔串、燒蕃薯仔串同燒味醂魚乾，燒物控制火喉恰到好處，燒得幾香口。