炊豕店 (威靈頓街) (已結業)

有d事做要去中環一轉，周圍都係貴價餐廳，上網揾左揾有咩平價d野食，就見到炊豕店，感覺都唔錯就決定試下。到既時候過左高峰晚飯時間唔洗點等位就入得，餐廳用點餐紙點菜，款式唔算好多，主打都係食豬扒飯，同埋少少台式菜式。自己叫左個人氣推介既葱油豬扒撈粗麵，男朋友就叫左肉燥汁秘製豬扒飯，再加左個滷水雞翼。野飲就叫左豆漿同熱蜂蜜生薑茶。首先上左野飲，豆漿係支裝好飲既牌子，男朋友今日既生薑茶一上就聞到好大薑味，咁啱佢感冒飲熱薑茶啱啱好。之後黎左葱油豬扒粗麵，一上菜都比佢個份量嚇親，幾舊大豬扒鋪係麵上面，然後一堆葱油鋪係豬扒上面，非常吸引。即刻試左一啖，豬扒外脆内嫩，煮得啱啱好唔會咬極都唔斷，食落亦都好香口。以前多數食叉雞飯先會配葱油，宜家先發覺原來配豬扒味道都唔錯！至於個粗麵就正正常常，都好吸到醬汁既香味， 分量亦適中。男朋友食既肉燥汁豬扒飯都好惹味，豬扒同樣大份鬆脆。之後黎埋雞翼，滷得都好入味，一碟有三隻。係中環呢d地段，炊豕店算係好抵食既食飯落腳點，非常推薦佢既豬扒，又大份又好味，值得再試！