達記 (已結業)

好耐都冇去駱克道街市，差唔多十幾年前曾經喺度晚飯，埋單平到唔信，而且質素唔錯，今日特登再嚟食個晏，睇下仲會唔會有呢個感覺！一層嘅熟食市場，有好多間食肆，花多眼亂，最後揀左達記坐底。望下餐牌，純講價錢真係冇得輸，食物即叫炒，是日午餐只係HK$30，送熱飲，仲係即叫即炒，頭先望倒隔離枱有人叫左個唔咕嚕乜乜嘅東西，好似幾好，一於叫番個是日午餐咕嚕班腩飯食下先，飲例湯。例湯(應該係菜乾煲豬骨)好多菜乾呀，又有肉同豬嘅軟骨，好似幾唔錯咁喎，湯飲落唔嗆侯，冇乜味精。咕嚕班腩飯飯到！賣相可以喎。試啲酸甜汁先，偏甜，略嫌棄酸度不足。試下所謂嘅班腩先(當然，咁嘅價錢呢啲一定係鯰魚柳啦!) ，咬一啖，皮好脆心好軟，而且好熱。即炒我一早知，汁再加預先炸定嘅魚一炒就得啦，原來佢地係炒前先炸啲魚，啲魚並唔係預先炸好或者番炸，呢個做法真係值得讚！啖飯就普通啦，冇乜飯味，但預左啦，熱辣辣已經好好。結論： 只要用心煮，普通食材都可以成為佳餚美食架，心係最重要嘅！