緊張咖哩麵

营业中

休息中

啱啱試咗呢間新開嘅「 緊張咖哩麵 」，真係冇令我失望！喺社交平台見到已經覺得好吸引，bookmark咗，終於搵到時間去試下。店舖裝修好有心思，保留咗好多香港舊時代嘅元素，牆身、招牌、燈飾都好有懷舊味，打卡位多到唔知影邊張好！落單先知「緊張」係關個辣度事，但我哋着白色衫，緊張嘅係件衫會唔會整污糟！✨好卵！緊張咖哩麵✨咖哩湯底超濃郁，香料味好突出但唔會太辣，啱晒鍾意重口味嘅人。薯仔同豆卜吸晒啲汁，超正！仲有炸腐竹，點湯食一流，脆中帶軟。有蔬菜（芽菜、豆角），值得加分。麵底係摻摻，好掛汁。流心蛋真係「好卵」出色！✨古早咖哩雞乾撈麵✨乾撈版本用咗幼麵，麵質好彈牙。醬汁似係黑豉油混咖哩，味道濃郁但冇湯麵咁辣，比較溫和啲。雞肉係雞髀，幾入味。唯一小小可惜係麵底濕咗啲，冇預期咁乾爽，如果可以再乾身啲就完美啦。總結：呢間真係值得一試，唔止食物有水準，環境又有心思，打卡同食味都兼顧到。下次會再去試其他款！