雲興隆小廚 (已搬遷) 新店位置

既然年底要柝, 幾熱都去食多幾劑煲仔飯! 坐在可能是全港獨有的牛下露天鐡皮卡位, 好熱但係有風味! 馬拉盞介蘭, OK La.冰梅骨, 上枱時有隻蚊g飛咗落去, 個哥哥二話不說成碟做過, 態度一流! 不過味道太咸. 同"名厨"既陳皮骨相差甚遠 - 不過一個係灣仔私房菜, 一個係牛下排檔.佢地既小菜只能算合格. 但係煲仔飯就真係好得. 可以追番哂d分數. 試過幾款, 始終鍾情於咸魚肉餅飯. 肉餅既油份沁哂入啲飯度, 加上咸魚既香味, 飯身又軟硬適中, 簡直係每啖都有after taste既!朋友話可以去隔離買三寶+魚彈入去叫煲仔飯, 都係一個唔錯既選擇.

星期二晚上，o岩o岩起北風，而我又約o左隊長去食飯，o甘食咩好呢? 唔使講就緊係煲仔飯喇!!我地7:00去到牛頭角下村，不過我地行o左去第九座，牛下真係好似一個迷宮o甘，行極都行唔到去第十四座，結果要勞煩隊長問o下人喇，一問至知原來o係另一邊。好快就搵到喇，一坐低，二話不說就緊係要個煲仔飯喇，因為佢地係即叫即整，我地先叫個土魷肉餅煲仔飯再加多個蒜蓉炒豆苗。豆苗好快就到，嘩...好味呀，豆苗都算嫩，亦有好香o既蒜蓉味。我地覺得好似唔係好夠，就加多個香檸煎雞。黎到後我亦急不及待去試，咦!?真係好食到不得了，好香檸檬味但唔酸，而且個汁好正，送飯一流，個香檸煎雞令我諗起中文大學新亞書院o既canteen，佢地個香檸煎雞個汁係好似膠水o甘，倒轉都唔會令到d雞跌落黎呀!!好喇...主角出場喇...土魷肉餅煲仔飯黎喇...一打開就飯香撲鼻，我就將d豉油淋落去，d飯焦唔算多但好均勻o甘分佈，真係不得了呀....一個煲仔飯兩個人分，份量真係o岩o岩好呀，全部清晒....

因今晚天氣有點冷，倆口子突然興起食煲仔飯的念頭。看了眾多食評，廟街著名的已嚐試了，太遠的又不想去，故選了在附近的此店。舊屋的地鋪食店，心中一早已對環境及清潔度不存期望，全仗對食物的期望軀使，決心一試。因熟識牛下，故不難找到此店。雖從諸君口中得知此店的雙魚飯為一絕，奈何小弟不好腥，主子又不吃紅肉，故選了一客北菇滑雞飯，一杯咸柑桔蜜，一枝青島。咸柑桔蜜先來，淡淡甜味中略帶一點柑桔味等了十多廿分鐘，飯來了，當用碗盛起上面的時，心頭頓時一沉，煲中的飯粒十分削，不是期望中的乾身，不知情者可能以為是用飯煲煮的，但奇怪的是它的飯焦卻十分，金黃中帶點焦黑。

情人節，本來想同個fd去旺角o的cafe 食飯，點知心儀的cafe天機棧fully booked，心血來潮想食煲仔飯。上網見好多人都大讚呢間雲興隆小廚o的煲仔飯，結果放工之後就去試。夜晚7點去到牛頭角下村，沿住第14座行左大半個圈，終於搵到。幸好我地7點就到，遲3個字就冇卡位坐，如果7點半到的話，直情連位都冇。o的人在情人節通常都會去o的環境靚靚有情調的地方食飯，估唔到呢度都有咁多人黎食喎。我地其實食左好少野，只係嗌左一個咸魚魚腩煲仔飯同埋瑤柱扒豆苗，加兩杯咸柑桔蜜。先講煲仔飯，咸魚係梅香，一掀起煲蓋已經香氣撲鼻，用筷子一夾就散開，入口唔會得個咸字，齒頰留香；魚腩好滑，個飯仲要有成4塊魚腩，好多料；o的飯焦薄薄的一層好脆口，唔似外面的煲仔飯一係冇乜飯焦，一係就太厚而好硬。特別一提的係佢地個豉油咸味同甜油適中，唔會令人覺得太咸或太多糖/味精。豆苗冇乜特別，一般的小菜類，不過要撈勻o的瑤柱獻汁先好食，因為o的汁都頗咸。另外嗌左兩杯熱咸柑桔蜜，都幾好味，有o的似阿媽浸的咸柑桔咁。不過唔知係唔係中途叫野飲，走左之後發現張單好似冇計飲品錢。值得一讚的係o的服務態度好好，好寬容親切，切合晒平民路線

或者我咁唔好彩，等食煲飯等了差不多45分鐘，不過當晚檯檯食客都差不多等咁耐，都無話可說。叫了醎魚拼魚腩及肉餅煲仔飯，飯的確唔錯，米靚飯香，但餸就....醎魚及魚腩真係好一般，食得腥的我都覺有腥味，肉餅味道還不錯，不過餸的份量真係太少，以30幾蚊一個煲仔飯，咁的味道，咁的份量，不太值。另外叫了碟蒜容炒白菜，個人覺得比飯更好味，可能等得太耐太肚餓，有嘢食就覺得好味吧。不會再來了！

睇到openrice既食評, 真係好多人讚佢地既煲仔飯...近派天氣咁凍就至岩來試吓啦, 2個人中午時段來叫左個咸魚肉餅煲仔飯, 即叫即整所以都等左成20分鐘左右啦, 一來香噴噴好吸引. d飯蕉夠多卜卜脆d肉餅都好正配埋咸魚十分美味.順帶一提佢地既咸柑桔真係好正宗, 應該係自己滲既桔仔夠清潤值得一試.只不過係環境比較唔太乾淨.

雖然飲食男女評價並非十分高，但係咁啱喺附近，一試亦無紡，一個田雞煲仔飯，另一個鮮魷蝦乾飯，原本蝦乾惹味，鮮魷鮮甜不失為一個好配搭，可惜得幾隻一蚊銀咁大似營養不良嘅魷魚仔同碎濕濕斷斷續續嘅蝦乾碎，咁嘅材料真係五蚊都唔值，仲要賣成三十八蚊，呃錢！飯夠乾身，飯焦易刮但係難食；另一個田雞飯份量睇落比較正常，可惜煲燶左飯，田雞唔新鮮，咁又收三十八蚊，可惜女朋友食完先出聲，否則一定叫佢再㷛過，不過算啦，煮一次等成三十分鍾，我都係情願過離篤串魚旦方便得多。地方預左污糟，衛生環境差，卡位特細，人一多，仲要坐四個人，兩個成年人坐，外面果個跌左三份一出去，食得更唔舒服，又人聲又電視聲，比旺角D 茶餐廳惡劣得多，一句到尾，永世冇下次！我唔明白下列咁多食評都係唔太滿意，但係又冇人俾喊面口？餐牌價錢更改過，或者以前價錢平，所以尚可接受，自從飲食男女介紹過後，人流多，材料要慳住用掛？我睇返下列食家上傳D 相，份量比我多得多，（飲食男女介紹日期前）呢D 唔知算唔算好心做壞事呢？

星期六收工搵地方醫肚，於是來左呢度試下﹗第一次來，傳統的舊式茶記格局，卡位迫，牆上的掛架滿是灰塵，貓貓狗狗在腳下團團轉。要了個豬扒包的下午茶餐，先飲最緊要的奶茶，奶味過濃蓋了茶味，心中打了點點折扣。豬扒包有相大家睇，包身是用軟豬仔焗過脆口的﹗不過豬扒只能縮在中間，細塊得不得了﹗沙律醬很多，頭幾啖同尾幾啖有點似沙律醬送麵包﹗工友點了的叉燒蛋湯意極有份量，超大碗抵食，味道平平不過抵食搭夠，只有加多少少胡椒粉食埋佢啦﹗不給喊分因約了工友再試佢的煲仔飯，希望到時可笑笑笑﹗

12月9日星期日今天我突然好想食殘忍飯, 但係平日去九龍城添樂園食過兩次就覺得味道麻麻地, d飯好多時會有燶味不太好吃, 所以上去openrice 睇吓其他食家有無d好介紹, 我就向依度睇到有間都幾近我的煲仔飯食店, 咁就一行三人一同去試試, 果然無令我失望我食幾樣嘢都幾好味, 我叫的食物如下1) 白菜仔沙錳魚豆腐湯- $40** 個湯好鮮甜無咩味精feel, 都幾有屋企湯水的味道**(2) 八珍豆腐煲- $32** d味都好淡, 份量都ok, 豆腐炸過都幾滑**(3) 臘腸雞煲仔飯- $33** 我哋叫北菇但係嚟咗臘腸, 臘腸d口感麻麻有d硬, d雞就幾嫩滑**(4) 咸魚魚腩煲仔飯- $35** d咸魚好梅香呀, 將它同d飯混合一起食真係好夠味呀我本人覺得咸咗些呀所以要再放d雞煲的白飯一起吃先無咁咸咋, 但係d魚腩真係幾滑**如果喜歡食煲仔飯的朋友可以去試吓呀, 地點都算幾方便價錢又ok, 款式都好多我見有許多小菜款但係我哋無試過不過見其他食客食d餸菜的樣都幾靚咁, 下次要嚟再試!!

上星期同女友光顧，人多，等了十五分鐘入座，安排坐在收銀處隔幾個鋪位，即糖水鋪隔離。叫鮮魷蝦乾煲仔飯、鹹魚肉餅煲仔飯、青島純生、汽水。由於煲仔飯通常要等二十分鐘，所以過了十分鐘左右，後加一個枝竹火腩大鱔煲，希望這樣可與煲仔飯同吃，可惜......再過了十五分鐘，煲仔菜先上。煲仔飯還未到，不要緊，可先吃這個。吃畢，飯仍然未到。等了又等，終於等到距離落單一小時十分鐘左右，第一個飯才到，再過五分鐘，第二個煲仔飯亦到。這不是個別事件，因為比我們遲來小許的三四人客，亦遲我們小許才有飯吃。其中一什至等了四十分鐘左右，喝完兩枝汽水就投降請辭。阿Q一點，這還選公平。其間我們都忍受一八至十人的顧客嘈喧巴閉，他們在我們入座時已經吃得差不多。但他們一路飲啤洒、玩骰盅、興高采烈地大叫，尤其是其中一位女顧客，我們連電視的聲音亦只聽到很小，我無看電視習慣倒也好彩、他們亦不斷在室內抽煙，我們走時他們還未有去意。不過，在等待的時候，太子爺亦主動幫我們各跟單，亦有禮貌。希望各位不會有我們的經歷，或者不會有我們更差的經歷。說會食物，煲仔菜是最好。燒肉的皮吸收了汁液，加上小小脆，很好吃，枝竹亦然，也不會水汪汪；鱔亦肥美。兩個

慕名而來!!叫了招牌雙魚飯+西芹炒雞柳+忌廉!西芹炒雞柳先上，賣上好得，兩個人食都好夠份量，wok氣好夠，食到唔停得口!5分鐘內清碟!雙魚飯仲得!等了30分鐘先上，一打開蓋，香到不得了，真材實料，ichiban!呢個冬天一定會再黎，試埋其他煲仔飯先得!!

名不虛傳的煲仔飯,材料新鮮!飯焦金黃、一刮其甩!咬落去卜卜脆!環境就要睇下個人啦,舊屋村唔係咁多人接受到.

近排天氣轉涼，有意欲食煲仔飯，見到openrice既介紹，知道有人讚既煲仔飯遠在天邊近在眼前，特意黎試試。等埋家人一齊黎食，落單後廿分鐘度就黎。先黎既係臘味煲仔飯，爸爸食呢個，覺得臘味硬左d。再黎既係滑雞臘腸煲仔飯，幾香，家人話ok。等多五分鐘左右，就送上咸魚魚腩煲仔飯。開蓋，落鼓油，關蓋。五分鐘，叫埋枝青島就開餐。一開蓋，魚香隨即撲面而來。鯇魚肉都算滑，飯就有咬口，用既係奉泰國米。咸魚加上辣椒絲令整個飯十分「妙」，食下飲下，體溫保持溫暖，飯焦果然可以成塊整出黎食，脆目地，爽!煲仔飯質素幾好，反之，沙嗲金菇牛肉粉絲煲就漏左單，吹單後等煲仔飯食晒先黎。這味汁比較「熙」，送飯都唔錯，但比其他餐廳既同款菜辣。環境比較舊，衛生一般，服務都唔會太差，無獨有偶係有木台客既bb女係咁喊。

天氣涼涼地，主人與奴隸獸認為最適合食煲仔飯及煲仔菜。於是去了朋友介紹的『雲興隆』，點了：1. 臘腸滑雞煲仔飯（HK$33）：臘腸肥潤，甘香，雞球夠腍夠滑，飯焦金黃，夠香脆，好有水準。2. XO醬爆黃鱔（HK$48）：大大條西芹，粗粗的黃鱔，刀功略為粗獷，味道OK。3. 八珍豆腐煲（HK$32）：豆腐較為零碎，味道一般。4. 青島純生啤酒（HK$10）

在附近操練完，當教練又想發揮其小宇宙，帶各隊友去吃飯之際。還好其中一位隊員是牛頭角地膽，立即代替了教練的地位，帶了大家來這裡吃晚飯。這裡是屋村冰室的格式，賣的除了一般茶記食物，蒸飯、海鮮、小炒也一應俱全。大家也陸續的叫自己想吃的，忽然想吃煲仔飯，因為想為自己加點能量，就要了個窩蛋牛肉飯。在這裡吃煲仔飯，也要等上一等，隊友們的碟頭飯或炒粉麵都吃得七七八八時，我才有得吃。飯底煲得幾香，夠乾身又粒粒分明，合胃口。牛肉是肉片而非免治牛肉，加上也是用化學品醃過的，美中不足。當然另外有一樣也是美中不足的，就是那隻已焗得全熟的窩蛋，如果可以生一點就更好；雖然不是炭烅燒的，但煲底不油膩，不黏底之餘，亦有不少的飯焦，廚房煲飯的功夫不錯。醬油帶甜，當然有味精，但情況不嚴重。總括而言，這個煲仔飯是有水準的，如果能在冬天來吃一個臘味煲仔飯，就更滋味。隊友們的碟頭飯，也大碟抵食。教練更蒸了一條魚，都抵食的。另外值得一提的是，啤酒夠凍，是絕對的凍得有浮冰在內的，透心涼。大哈爾濱啤只賣13蚊，比一般的凍飲更便宜。連啤酒一支，埋單38蚊，吃得飽飽，是絕對的經濟抵食。