譚仔三哥米線 (福榮街)

营业中

休息中

食過好多次，最近叫親都係過橋米線。過橋米線--乜都有，包括腐竹，竹笙，牛丸，墨丸，魚旦，牛肉，豬肉，腩肉，炸醬，九菜，酸菜，雞肉，豬膶，芽菜。最好係炸醬會分開上，因為炸醬比較油，會影響湯底，所以分開上好好多。米線多，料多，但有時豬膶會唔熟，牛肉會太ｕｎ，呢個要多留意。辣的程度間中不同，大辣會變中辣，中辣有時又會接近大辣，但點計都唔會話唔麻唔辣。加多三蚊有野飲，抵。

我講既係同公司附近元洲街分店，深水埗食來食去都係茶餐廳，大熱天時都想轉下口味買米線外賣，好多時會見到碗米線入面有Ｄ黑色細細條好似眼眉毛狀一樣既短毛，漂浮o係湯上面，開頭都唔多為意，直至最近見到條黑色既物體o係個碗蓋度郁下郁下，先知原來係一條條生勾勾蟲黎既，個一霎那真係連隔夜飯都想嘔返出黎…….

譚仔以前都食過，記得好似唔係咁辣架喎！我同女友都係叫小辣，但就越食越辣，真係好鬼勁，女友仲唔識死走去落辣椒油，直頭流晒鼻水添~不過呢度o的米線真係好抵食，三"食送"米線加一杯飲品都係廿五蚊，而且用料新鮮，米線較幼身但軟硬適中，湯亦鮮甜(因為後來叫了一碗清湯中和辣味)，配料有齊韮菜、腐皮同芽菜。除了米線外亦食了出名的土匪雞翼，雞翼相信是烤的，面頭沾滿了黑芝麻，肉質嫩滑而且入味，不錯的小食。

無論是大碗$31元還是三餸一米線$22,配菜與米線同樣出色,個人較喜歡清湯,因為麻辣讓我出晒汗.另外加兩元有凍飲,這正是這裡體貼之處.又一個去完黃金搵食的好去處

返學前去行左個夜運, 行下行下, 行到呢條街, 都好多食肆, 唔知揀邊間, 見到間熟口面o既, 就走左入去。呢間未開咁多分店前巳經成日幫襯, 深水步呢間係第一次, 點左個兩食送米線, d米線仍係好滑, 湯底好似比以前進步, 飲落好清, 唔似街坊牌味精o既味道, 豬潤好香全冇苦味, d炸醬差左, 個外表仲好唔靚仔, 只因好似脫色免治碎牛咁......

我第一次依消夜係10.30pm.我同細佬.諗唔到食咩.佢竟然提出去呢到食.我就叫了個酸辣魚旦加酸棻.....湯是免費的.下次要試麻辣細佬叫了個清湯....佢誤會左台面張餐牌.(被欺騙)再叫麻辣雞翼. 不錯夠味夠辣勁麻不錯的消夜

其他店子的大辣也不及這裡的中辣厲害，所以這裡的小辣也分五級，店內菜單內也提醒食客初試要從小辣開始，待應也不時提醒．這裡的辣是不見紅色的辣椒油浮面的，要食落才知味道，我幫襯了很多次，才只見過一位女士吃大辣，至於特辣，聴也未聴過．也不敢以身試法，因我只是中辣級，不過嗜辣者是真的過足癮了．

一入到去,見到個個也一身汗,也見到好多用過的紙巾,心知不妙,一定會好辣.女朋友食左麻辣中的特辣,本身好食得辣的佢都辣到塊面紅卜卜,我飲左兩淡都知道頂唔順,又麻又辣...真係辣得好勁.而我的酸辣也不錯.都ok. 喜辣者要去.唔食辣者千萬唔好去

今日叫左個小辣墨丸牛肉米線,點知個湯底鹹到飛起.完全唔掂啊.

今次食酸辣湯底, 唔係好夠酸, 米線質地好過佐敦, 料就差唔多. 土匪雞翼都好過佐敦. 但地方就唔係咁企理, 未必會再o黎.

事實上,本人不太好米線這東西的......可是友人曾聽聞此店的米線好吃.所以我也抱住無所謂的態度去試。由於我地成十二個人,好難有一張容納到我地咁多人,但係o的食客都好好人,讓張大俾我地,在人迫人的情況下,我地都坐得落。我自己叫左一個炸醬+墨魚丸(小辣)米線($16一1麵,其後每加$3,我o個個$19)可能我麻麻地食得辣啦,我愈食愈覺得spicy,不過o的米線比我以前o係其他店舖食既好食,都試得過既。之後我地五個人share左一碟「土匪雞翼」,$20五隻。個面有o的黑芝麻同埋有o的香草醃左,都幾香,試下無妨。不過我最唔滿意既係周圍太多人食煙,迫我硬食二手煙,大哥大姐,你地究竟黎食野定食煙架!?你地不如將食煙o的錢黎食好野或者捐左佢好過啦,做埋o的損人不利己既野。總括黎講,除非我經過o個頭,唔係我唔會專登去食~

一入舖頭，聞到陣陣麻辣香味，人人都手持紙巾，哈。坐底，睇下個menu，見到好多料選擇，其中有款過橋米線套餐，差唔多大部份材料都有，售三十一蚊，於事叫左一個試下，麻辣湯底，本想叫中辣，但係個阿姐叫我地如果未試過試下小辣先好d，咁我就叫左小辣，而友人就叫左個中辣。再叫多兩個食，雲泥白肉，土匪雞翼。米線一到，嘩，咁大碗架?! 見其他人o個d好似冇咁大架喎，原來過橋米線套餐係大碗o既。個湯底奶白色，睇落唔似會好麻辣，聞落好香。食落覺得辣度比外表高，但本人對中辣尚可接受。材料方面，竹笙好正，索哂d湯。腩肉亦好可口，仲有酸菜夠醒胃，豬潤亦都好夾，其他的有牛肉雞肉炸醬等屬於一般水平。小食方面，土匪雞翼幾等別，表面有芝麻香脆可口，雞翼亦都十分入味，上時熱辣辣的。雲泥白肉，好薄o既腩肉片，浸住d辣油豉油，表頭舖上好多蒜茸，頗肥膩，未必個個o岩食。總括黎講係一間好食o既麻辣米線!

上次摸錯隔離新昌隆，今次牛咁眼望清楚至入來啦！星期二繼續閒遊，下午送手信去深水步。兩點幾至食飯，諗住點都要試下呢間譚仔，睇下有無元祖舖咁掂。雖然飯市已過，但人客一點都不少，大部份時間是滿座的，果然是犀利。好在我一個人易搵位，好容易便在旁邊坐了下來。個人喜好麻辣多過酸辣，所以就叫了麻辣米線，上次在長沙灣店要中辣也幾辣，今次見佢D湯底的色水好似唔係好有殺傷力，所以就要了個大辣試下，配料要了腐皮及牛肉。可能人多，都要等了一陣才有得食。碗米線幾大碗，以廿蚊都唔使來說是幾抵食。湯底如言似雞湯，毫無殺傷力。渴一口係幾辣，但如我的味覺記憶沒錯，這裡的大辣也沒有總店的中辣咁勁，可能是調低了辣度等多些人接受，下次如果再來可以試下勁辣。味道不錯，是辣多於麻，始終又平又正宗的麻辣，還數已無奈結業的Q嘜；腐皮吸了辣湯，是吃麻辣的一個不錯的配料選擇；牛肉幾韌，早知要雞肉，或牙菜都好。加一杯涷飲，埋單22 蚊，平又抵食，麻辣也算有特色，難怪咁多人幫襯的，不用等位的話，可以一試。當然你如果食廿幾蚊野都要充滿驚喜的話又當別論。

d湯水好"水", 米線好淋, 失望！

上個月來食,叫左一碗清湯腩肉牛肉米線,一碗酸辣豬潤竹笙米線,我食酸辣豬潤竹笙米線,都幾酸幾辣,但亦好味,d竹笙吸o西d湯,好正...d豬潤就細細件,都ok....而清湯就男友食,佢覺得一開始食無咩特別,但話愈食愈好食,hahaha.......唔知點解!!!而豆漿就唔好飲,都無豆味既......