田記魚蛋牛腩專門店 (碧街)

营业中

休息中

【#牛雜專家🐮 】#田記魚蛋牛腩專門店 （油麻地）提起食牛雜粉一定會諗起深水埗果幾間，之前有網友話係 #油麻地 都有一間質素幾唔錯，一直都冇機會去食，唔係食飽咗就係唔順路🤥今日剛好要去旺角做野，想食少少野先，咁就啱晒👍中午12點後入去，都已經差唔多坐滿，叫咗最愛既牛雜河，$39單點，價錢上還可以啦，當然冇得同深水埗比較。都等咗一陣先上檯，見到師傅係咁出外賣，可能咁啱有張大外賣單要做先。試第一啖湯係清清地，好彩檯面有支魚露比你加落去提鮮，即刻唔同晒👍 河粉幾好食，都幾大碗，夠滑身。牛雜份量都唔少，牛肚比得最多有四舊，都做得唔錯。值得一提，店入面有一位阿姐都幾霸氣，經常都好大聲叫其他員工做野，甚至會叫幾個客食完傾完計就好走😄即係叫你唔好阻住，唔知佢地係咪識既所以先咁講，如果唔係都幾頂癮😎推介指數：6/10@foodiehck2022 #港飲港食 #牛雜河 #潮式粉麵 #油麻地美食 #湯河

呢度並唔係一間高級西餐廳但係裏面提供嘅嘢食絕對高水準！雖然平時鍾意食西餐，我更加鍾意食貼地抵食粉面🤭間唔中去開油麻地蛋糕嘅材料之前，我都會食飽飽🤣唔知大家有冇留意油麻地A出口隔離有間「田記」邊間粉麵店，今次經過吸引住我嘅係「牛魔王」😍作為一個牛粉絲真係忍唔住衝入去叫個牛魔王！原來佢哋仲有馳名嘅魚蛋魚皮餃🤣牛魔王河粉 $60呢個牛氣沖天牛魔王係真店之寶之一！包含牛崩腩、牛筋、牛肚、牛大腸、牛小腸等等牛嘅部位！牛崩腩炆得非常軟腍，油香肉味濃！牛筋亦非常入味！非常豐富！崩沙牛腩河粉$50即係真店之寶其一！聽聞係銷量第一！朋友即刻order!!!牛腩爽而且嫩滑！本來以為$50只有三四件牛，誰知份量仲非常之多！蘿蔔甜又非常入味！呢個價錢真係抵食淨魚三寶 38知道呢間舖頭仲有招牌魚蛋，梗係食埋佢嘅魚蛋！淨魚三寶有齊魚蛋、魚片同魚皮餃！魚蛋魚片爽口彈牙，魚皮餃大大粒，鮮味十足！另外仲叫咗一碟腐乳油菜食咗咁多肉梗係食返碟油菜中和一下！特別鍾意食粉麵店嘅油菜，唔知有冇人同我一樣！

剛好約咗人去旺角登打士街，上網見到呢度啲牛腩好多好評，我自己好鍾意食清湯腩同柱候牛腩，所以好想同黎會一會佢坐低冇耐好快就有得食，牛筋炆得相當淋，仲好入味，真係幾好味😋，牛腩其實肥瘦適中，所以入口都係好容易咬開嘅狀態，係好味嘅，但當然，😌各人有自己喜愛嘅口感，我就當然有心目中更好嘅牛腩選擇，😊但牛筋確實冇得輸湯亦都非常之清甜，我就非常之鍾意飲加上我好鍾意多青，所以真係好啱我整體其實都係好味嘅，但當然環境衛生情況就有如一般茶餐廳一樣，唔好要求太多

太子塘尾道田記都成日去，他的油麻地近碧街店就冇去過，今日下午行過入去試下先🤔。✨店外環境近Ymt 地鐵站A1出口，非常方便，一出地鐵口就睇到，但人流比較旺和雜些。✨店内環境比太子店小一些，雜亂一些，唔係咁企理，有d唔係咁乾淨的感覺。✨食物質數坐底叫咗碗best selling 的牛腩米，上枱時碗米的牛腩擺得唔係咁好，食落有些柴，牛味一般，湯底牛味淡而牛骨味不足。油菜和其他牛腩店差多。食完嘅總結係，食牛腩都係行遠D去太子店，地方大，光猛，牛腩淋滑，湯味濃又熱，一句講晒，老闆坐陣係唔同D，今次只可勉強俾個ok佢啦！

今次去嘅係位於油麻地地鐵站出口附近嘅一間貼地，價錢經濟又實惠嘅小店，相信好多香港人，一個星期總會有一兩餐係係依類型嘅餐廳度食，呢度冇牛扒龍蝦，但係總會令人食完又想食，佢就係牛腩麵檔。相信香港人對於牛腩麵都有一定嘅要求，因為實在太多選擇，而且有由細食到大，相信係香港人最熟悉嘅一種餐廳，呢一間麵檔，其貌不揚，裝修地道，叫咗兩碗面，分別係牛雜麵，同崩沙腩麵，我相信呢兩碗麵最能反映到一間牛雜舖嘅質素，湯底，牛雜醃得入唔入味，一試便知，果然無令我失望，牛腩腩汁香，崩沙腩肥瘦相間爽口。牛雜足料，如果有時間下星期會再嚟食。

呢間粉麵店嘅魚旦有號稱自家制造，在食評界都叫做係一間名牌人氣店，揾食肥華亦係一個魚旦粉愛好者，6月13日要到廣華醫院例檢，路經此店亦被佢嘅名氣吸引入內試吓佢碗魚旦粉是否坊間傳說咁正，當日大約下午兩點左右肥華到達此店門前，巳見店内有八九成入座率，人氣之店果非虚傳，經此店員工安排座位之後，肥華柯打咗此店名物之一，魚旦湯河粉一碗及一杯涷檸茶，等到名物上枱，肥華先嚐湯底，感覺非常清淡衹有少少魚旦粉湯底味道，再試埋個魚旦，彈牙，爽口，魚味呢三種好食魚旦嘅基本條件都冇，咁呢碗魚旦粉正常好味嘅反而係魚片，及個河粉底而杯涷檸茶都係大路貨色，總結在人流旺區以$42食到咁嘅水準魚旦粉餐係OK嘅，但唔好抱住朝聖心態來此店試食，咁你就會此店魚旦粉失望少啲

可以透過玻璃見到廚師煮麵廚房內熱氣滿滿，牛雜不停翻滾係門口就已經聞到牛雜香味店內環境唔算大，但係整齊企理—-✄———-✄———-✄———-✄———-✄—-✾牛三寶河粉 $50牛三寶包括有牛腩、牛肚同牛筋好大碗，份量十足，河粉滑身牛腩牛味香濃，食落比較有嚼勁牛肚係金錢肚，軟腍鮮嫩牛筋炆得軟身之餘仲煙煙靭靭唔會太腍冇左口感✾招牌魚蛋米粉 $35除左魚蛋外，仲有魚片一樣好大碗，米粉係偏粗身少少所以食落比平時有咬口彈牙魚片頭同魚蛋各有三件魚蛋好爽彈，魚味十足魚片調味足夠，食落爽口✾淨鮮蝦雲吞 $35 鮮蝦雲吞有七粒每粒入面都有原隻鮮蝦鮮蝦同豬肉比例同調味岩岩好食落鮮甜✾蠔油生菜 $16追加左碟生菜，生菜灼得剛好保持到生菜爽脆

崩沙牛腩河粉是招牌之一。牛腩极之嫩滑，味道浓郁，加上清甜籮卜，湯更美味鮮甜，超乎預期的好味。位於油麻地地鐵站A出口，极之方便。最近試過兩次后已成為至愛粉面店。👍

位於油麻地的粉麵店，地理位置優越，一出地鐵已經見到這店。外面望進店門口及玻璃，已經見到廚房的大湯鍋裡面翻滾的牛雜，熱騰騰的冒著煙霧及牛香氣飄散在空氣中。麵食：招牌魚蛋米線主打的招牌湯麵推介，由人手打成的魚肉丸子，口感比平日吃到的彈牙，不是那些帶粉狀的。除了魚蛋外，還有數片魚片。清湯清甜，夠味，還可加點辣油，店家推介，自家炒製的辣椒粒。麵食：墨魚丸米線墨魚丸大粒，真材實料的墨魚。這碗額外加了紫菜，令湯底加添紫菜的鮮味。可能外賣關係，米線浸久了變得有點腍。魚味濃鮮甜有肉汁。飯類：牛三寶飯（牛腩、牛肚、牛筋）牛腩半肥瘦，肉質爽滑；牛肚煙韌，格格分明；牛筋膠質豐富，還有白蘿蔔。底下的白飯加了腩汁，令白飯帶牛肉香。白蘿蔔鮮甜，尤其是沾滿牛腩汁，很入味。

是日去油麻地果欄買水果，順便試下呢間地鐵站一出就會見到佢嘅牛腩魚蛋粉麵店。-崩沙牛腩河-牛腩魚蛋米粉湯底一般，個崩沙牛腩份量適中，味道口感都唔錯，加上個蘿蔔都煮得夠淋。魚旦比較普通。

之前聴谷友介紹，今日過嚟試吓⋯好小見D餸蓋唔過碗麵，每部位有2件左右，麵底好大份，差D食唔晒，湯頭無乜味，係淡而無味果種⋯D牛什亦冇乜特別，而且偏淡，真係唔知佢點做，真係一試難忘，難食到一個點，返兜指數係 0 ⋯#田記 #碧街

,幾星期前第一次去堂食兩公婆叫咗兩碗魚蛋粉覺得魚蛋是好食的，於是叫外賣魚蛋和魚片各半斤回家，這次我望佢秤是足秤的。昨天第二次從將軍澳出開街專程去嗰度買外賣一樣魚蛋魚片和一盒淨牛雜，佢哋叫我出門口等所以冇望住佢哋秤，回家後牛雜冇問題，但發覺魚片吾足秤欠一兩都算，但魚蛋放落手感到好輕原來欠三兩就過份咗，做生意咁做邊有回頭客呀！你要咁做生意就冇下次，以後都吾會再來！

之前都有朋友推介話田記個崩沙腩好食，但成日都經油麻地落地鐵都經過，但都行過沒意慾幫襯，今日突然想食牛腩就想起去試一次吧！因為老友話好食，咁就一叫就叫個最正的招牌崩沙腩，如果連貴的招牌都唔好食咁就無下次囉！一上枱好大碗WOR，仲有成七件有一定厚度的崩沙腩，每件都筋腩相間，仲要我呢碗係中間肉不算厚反而兩層筋膜佔了一半，應該是接近爽腩那邊的部位來的，睇落都已經唔錯。先飲啖湯，足料有牛骨味但又不會太咸，再食崩沙腩，筋位都炆得夠軟但中間的肉又不會淋到散，師傅炆煮的火喉都掌握很好👍佢用的河粉都是比較薄身滑溜的唔係求其入D普通貨來賣。尤於我鐘意香辣，就加D潮洲辣油，加左D牛腩仲更好食，而佢最值得一讚的是崩沙腩河會有多兩件腩汁煮過的蘿蔔，食到個口感覺很膠就可食啖蘿白清清個味覺，吃完成碗都唔會話好油好漏的感覺，四十幾蚊有碗咁的質素崩沙腩河，真係超值，呢間一定有下次！

以下為真實對話：👱🏼‍♀️：你食咩？👩🏻‍🦱：牛腩河👱🏼‍♀️：河粉好油架 唔得呀 食米粉啦你👩🏻‍🦱：河粉好食啲呀 又唔係成日食！👱🏼‍♀️：河粉真係好油！！卡路里、熱量、膽固醇又高，你一定唔可以食⋯⋯⋯⋯⋯⋯⋯（下刪二十字）👩🏻‍🦱：⋯⋯咁米粉囉👱🏼‍♀️：嗌碟菜好唔好？👩🏻‍🦱：好呀好呀👱🏼‍♀️：但碟菜要走油走蠔油架喎👩🏻‍🦱：😑咁邊到好食喎⋯⋯👱🏼‍♀️：😒其實走左都好有味，因為佢都係返果煲湯去恰，我地宜家係食菜既營養，唔係食調味料⋯⋯⋯⋯⋯⋯⋯⋯（下刪五十字）👩🏻‍🦱：你話事呀🙂我有理由相信娘親唔會再同我出去食嘢🤣▪️牛丸牛腩米 $43▪️牛腩米 $36▪️生菜 $15聽講田記牛腩好出名，食過覺得還好啦😮‍💨牛腩附送少少筋膜位？定肥膏位？我唔識當然丟晒😌有啲牛腩夠晒稔又入味，有啲差啲比較乾同柴，但份量足係真既，好似食極都有🤣勁掛住潮州牛丸，所以order左雙拼🥰呢到既牛丸都有驚喜，一粒粒氣孔入邊都充滿油份，超juicy勁肥仔又好彈，接近家鄉既味道～～～～～

有2間分店,今次試埋呢一間,上次食牛腩今次食魚蛋魚片頭仲有雲吞水餃標明全魚肉打成,同平時食既魚蛋有唔同口感,無咁爽身同彈牙,明顯粉少好多口感嫩而滑,魚味濃鮮甜有肉汁,唔會好爽口但好食,仲配菜底,$30抵食另外試埋每日新鮮包既水餃雲吞,可雙拼配粉麵雲吞薄皮而嫩,餡料飽滿,有蝦同豬肉,幾好食唔重口,蝦身爽甜水餃夠脆,皮又薄,夠大隻,餡料多,木耳絲加埋肉餡好豐富加凍飲加菜都唔洗100蚊,好抵食田記魚蛋牛腩專門店油麻地碧街45號地下C1號舖