甜源居

营业中

休息中

嘩! 我仲以為佢o地摺o左添! 乜係海鮮街盡頭呀? 下次我會去尋寶先!上次我同d 朋友, 去食發記jar! 唔係話佢唔好, 不過我始終都係甜源居o既FANS!YEAH

每次去西貢食甜品，我一定要去滿記旁的甜源居。上個月去的時候發現他們結業了，即時石化！後來在雜誌看到原來他搬家了，趁weekend立即入西貢！甜源居的新店很僻，在海鮮街的盡頭。相信是原本滿記旁的位置加租吧！千辛萬苦，山長水遠入來當然要食他們的招牌甜品—芒果甜心撈河和白雪公主。水準依然，河粉口感一流，非巿內別店所賣的。據老闆娘說，他們所採用的野生魔芋粉是最好的等級，百來元一斤的，不是可以用大菜糕替代的。一整碗河粉放在濃郁的芒果汁中，再加上接近一整個芒果的果肉，份量十足，齒頰留香。白雪公主用山竹，薏米，彈牙的魔芋粒及脫脂奶造，不太甜，有香濃的奶味，山竹獨特的清香酸甜，混為一體，非常好味！加上薏米有排毒養顏的功效，食得更開心！當滿記可以在巿區內食到，下次入西貢可以試試甜源居。

有一次同o左女朋友同佢family 去o左西貢食海鮮, 食飽之後諗住去食糖水, 見到西貢糖水一哥"滿記"爆o左, 咁之後就去o左o係滿記隔離o個間甜源居度試下啦. 估唔到甜源居o既甜品令到我地難以忘記, 仲好鬼回味添....果間鋪頭o既特色甜品有芒果河粉, 如果未試過都唔知原來呢一種甜河粉係咁好食o既,而且份量仲好足夠. 先先食o左個河粉再飲埋o的芒果"湯底"就真係極之飽啦, 河粉唔單止煙"un", 而且好有口感.真係好味!另外, 不得不提o既有炸雪糕, 外暖內凍. o的炸皮好香.雪糕好軟. 好好食! 值得一試.到依家我女朋友都成日叫我同佢去多一次, 大家不妨都去試下.

今晚喜逢久未遇著的好天氣，一於去游車河兜兜風！去到西貢，已是凌晨十二點幾，舖頭全都關了，白天熱熱鬧鬧的西貢頓然變得冷清清，唯獨滿記仍是擠得水洩不通，人山人海。但旁邊的甜源居雖不至話小貓三數隻，但起碼可以讓我倆舒舒服服的吃個甜品！今次回歸簡單，點了最基本的椰汁西米露($15)及木瓜鮮奶($18)。落了鮮果的西米露容易被喧賓奪主，嚐不出椰汁的清香，今回椰汁西米露令廚師的功架無所遁形。送上檯時已是椰香撲鼻，食一口，真的好濃郁的椰子味，還有淡淡的奶香，而西米亦弄得剛剛好，很有嚼頭。相比之下，木瓜鮮奶就有少少失色，可能是木瓜同奶的比例問題，木瓜不夠香，亦不夠甜。食完後睇番個價錢，原來都幾貴！

星期日行完山, 路過西貢, 記得呢度d人係咁讚呢間舖.於是入黎試下..我叫左個芒果河粉, 女友想叫榴槤布甸... 可惜老闆娘話只有斑戟, 於是再叫唔記得乜乜荔枝乜乜.. 可惜老闆娘又話唔當造.. (過程就好似麥兜咁..哈哈...) 最後叫個楊枝甘露.可能個腦一直都諗住呢度d人話佢點好點好.. 個味覺好似差左.. 芒果河粉賣相好正.. 大大碗. d芒果好甜, 但好似唔係呂宋芒, 成碗芒果汁再加河粉, d河粉好粗, 頭一兩啖幾好.. 跟住就好似有d怪.. 因為食食下冇咁凍.. 整體都ok.. 楊枝甘露就好足料.. 都算杰.. 兩個甜品一齊食.. 味覺唔夠敏銳.. 味道都ok喇.. 老闆娘態度好親切.. 但都幾貴.. 53蚊埋單....

今日又係天朗無雲、陽光普照的好日子，約了一眾Openrice的食友行馬鞍山，天氣好、風景靚，非常高興。上次行大浪西沒有吃甜品，今次當然不容有失，行完就立即拉隊來了這裡。隔離滿記又真係好多人，呢度反而剛剛有兩張大檯。試了不少甜品，感覺上呢邊是種類多一點，又好吃一點，幾款甜品簡評如下：榴槤斑戟：三舊分開六份，綠色的斑戟皮幾厚，姑勿論用料如何，個人比較喜歡薄一點的斑戟皮；裡面忌廉對榴槤肉的份量是6比4，榴槤肉雖少，但味道好正，夠腍又夠香，當然可以再多一點就更正；芒果河粉：「河粉」已是新派甜品舖的指定動作，這裡的河粉由海藻及蒟蒻製成，照例是吃不到任何特別的味道。加入芒果肉及芒果汁，坦白講未見佳處；濃濃果香：蘋果汁西米底加各款生果球，行完山食就幾涼快，不過亦是未見佳處；遍地金沙：個名唔肯定，是什麼金沙的。西米布甸底加黃糖在面用火槍燒一燒，似乎是牛油果話齋，想學法式燉蛋的效果。但一人一羹，吃過後一致認為，個底比個面好食。算幾特別，都試得過；紅綠：傳統的糖水又不差，不太甜，幾多料，由此可見呢度係唔錯的；豆沙窩餅：新鮮炸起，熱辣辣。豆沙餡唔太甜，都算幾好味。另外仲有榴槤抄手，不知味道如何。又睇番以前的

食完一餐唔好食的晚飯，我好堅持去食甜品補數，今次醒目冇去錯隔離。因為人多關係，我可以每樣糖水都試了少少，我仍然食番綠豆沙，我未食已聞到一陣臭草香，食第一啖果然正過隔離舖。除了綠豆沙外，黑白芝麻糊亦係推介之一，食得出係生磨，唔係開粉，還有淨白芝麻糊好少食到，味道都唔錯，但唔夠凈黑芝麻糊咁香，其餘合桃糊、涼粉等都有水準喎。還叫了兩客炸雪榚大家share食，每客一球分四件，原來裡面係雪榚蛋榚，外層係炸吉列皮，外面唔熱，而內層雪榚沒有溶到，完全食唔到內冷外熱的口感。除了炸雪榚外，其實其他糖水都有水準，我o地仲見到老闆娘親自試糖水，還用心教伙計整糖水添。好期待28 號與各位食友再下一城。

食完Pizza 同意粉行左陣先黎食甜品, 之前未黎過見評語好多人讚咁試一次啦! 起碼唔駛次次食滿記。呢度都幾多選擇, 之前就一心諗住試d特別野, 叫左楊枝金露布甸同炸湯丸。楊枝金露布甸都夠滑, 足料, 一試兩樣都幾好; 炸湯丸係成粒芝麻湯圓炸, 另上一碗芒果汁, 開頭唔知用意, 食左第一粒就知係用來減低油味, 如果唔點汁真係幾重油味, 點左就冇咁熱氣咁啦, 比較下甘潮的炸湯丸做得好d。當晚可能時間都9:00 左右幫襯, 又落完雨, 得3檯客, 反而隔離的滿記差唔多坐滿人, 名氣大d掛!?

多數去果度附近都係去呢度食, 好少入滿記,都唔知點解滿記成日都會咁多人,果度d甜品都係麻麻地ja,呢度果d 好食好多好多倍,而且仲大碗d!!

上次同男友入黎西貢食完late lunch 之後就黎甜源居再續下半場. 我叫左一杯好似叫"冰涼透心"(係咁上下啦!)的刨冰.刨冰混入低脂牛奶及蜜糖. 底部有魔芋絲. 舖面有Kiwi and Strawberries. 味道大家其實可以想像到. 從其用料黎講.應該對排便係幾"洗得"的=)仲有. 呢杯野好大大大杯. 飲完飽到飛起!男友依然叫了楊枝甘露. 表現OK. 本來今次係想食佢地好出名的芒果河粉的. 但係原來早一晚已經賣晒. WEll, 真係咁好食? 下次一定要試下.

去西貢食甜品,我只會選擇甜源居(除非友人堅持要食其他). 呢到d 款式較特別,例如白雪公主就係我o既至愛.白雪公主個汁係白雪雪,有d奶味/椰汁味,但係清清o地,唔會太甜或太漏. 夏天佢o地會用山竹, 一絕! 山竹唔靚o既時候,佢o地會改用荔枝,都唔差.仲有d椰果同薏米做底.正.黑馬王子好似係d有黑色心o既西米, 唔知叫咩名, 但都幾好味gar. 坦白講,呢間o野人氣絕對唔夠人o地響,所以好少會有冇位o既情況,但係佢o既質素絕對得. 係公仔箱做體育節目主持果個韓旭霞好似係呢到o既老細gar....

我食甜心可粉唔係在呢間總店食,而係在東港城的吉之島入面食,因為佢地放左D貨0向入面賣,第一次見到佢時,就想買黎食啦,不過因為太飽0既關係,所以都係冇買,不過前幾日,終於食到喇,,,,,不過,,D mango 0既味道好似有少少少少苦苦地.唔知係唔係我買時都已經係夜晚十點喇,有少少唔夠新鮮,不過大體上都好食,D粉好有椰汁味,勁香喎,不過我諗入西貢食會仲好食!~ 而家佢地放0向度賣,真係有利有弊啦.利係我地呢D死懶鬼唔駛山長水遠走入西貢都有得食佢地0既甜品,但唔好0既係,質素好難保持囉.始終都唔係即叫即整嘛,真係有好有唔好囉^^"

山長水遠去到西貢,梗係想搵D好野食,以前就羊群心態咁入左滿記,結果每次都大失所望,突然有一日,在滿記中間的甜品店,有一大班明星及歌星,我以為是拍戲,立刻轉軑走去簽番個名先,誰不知,原來佢哋只是來食野,立刻照跟佢哋ORDER嘅野,如芒果河粉,楊枝甘露,榴槤班戟等等,結果俾咗我驚人嘅大發現,芒果河粉超滑超好味,楊枝甘露足料得又清甜,榴槤班戟香滑有口感,真係每樣都好有水準,直頭嬴滿記幾條街,好掂,甜源居大發現!

未食過這麼好的甜品(甜心河粉), 最初聽見個名有點卻步,甜的河粉?嘩!點食呀?魚河的河粉加芒果??後來管著試下唔使死的精神, 一試,嘩!....原來河粉不是魚河的河粉,但很香很滑,加上芒果汁香濃,一試上癮.但要去西貢先可以食..太遠了.

一連食左兩晚, 試左芒果河粉, 楊枝甘露, 白雪公主, 生果皇后款款都好食呀, 芒果河粉好得意, 真係成碗麵咁, 湯底係鮮芒果汁, 配料可選芒果or鮮雜果, 河粉滑嘟嘟, 食完會好飽.楊枝甘露時時食, 唔多講, 不過比出面0既做得好白雪公主, 朋友叫的, 成碗真係白雪雪咁, 我見佢用料係用山竹, 洋薏米etc , 仲諗住一定好怪, 點知係出奇地好呀!生果皇后, 顧名思義係好多生果, 仲有椰果, 生果好新鮮! 芒果汁做底, 食完仲有得飲~ 健康之選Take away 左一份榴槤pancake, $26好似貴左d, 拎到返屋企雪左成廿個鐘先食, 個皮依然軟熟, 母親大人話好食. $26都抵返啦