王牌·圍一叉燒

营业中

休息中

係大圍地鐵站附近就見到呢間餐廳遠處睇個餐廳招牌就覺得勁搶眼🤣🤣見到門口勁多人排隊 諗住啲嘢食應該都OK嘅有啲肚餓 於是我就去呢到食下午茶醫下肚下午茶選擇都幾多 最平$29就食到 冇收加一今次就叫咗個✨沙嗲牛肉潛艇(💰$38)配熱檸蜜個潛艇都幾足料 有好多塊沙嗲牛肉 幾抵食👍🏼另外仲有啲生菜同蕃茄 加埋一齊食就冇咁膩🍅🥬而熱檸蜜就正常發揮啦 甜甜地咁叫完個餐後 就陸續聽到好多人嚟買燒味斬料番屋企我估啲燒味應該ok 下次有機會試下先😌😌

大圍站對出，新開大約一個月左右（好似係），最近首選嘅飯堂，午餐、下午茶、晚餐，三個時段都幫襯過，唔重複咁試佢啲食物。每次食叉燒瀨，最驚就係啲叉燒浸落個湯度，浸到啲叉燒淡晒味。 更加慘嘅係，嚿叉燒柴到可以攞去生火。不過王牌嘅叉燒瀨就冇呢個問題，嚿叉燒擺入口嘅時候畀我嘅驚喜就係，仲有濃厚嘅蜜汁幽香，咁當然係唔柴㗎啦。至於佢個西多士，份量係足嘅，但始終有個普遍嘅問題，就係越近中心，啲花生醬味先至越明顯，其實問題不大，係我性格缺陷，鍾意雞蛋裏挑骨頭。總體而言，暫時都無乜挑剔，食得相當滿意😋👍🏾。希望佢可以一直保持水準，咁就可以成為我心目中餐廳界嘅夢乃愛華❤️世一嘻嘻🥰。

平時經過大圍，見到呢間「王牌」茶餐廳嘅燒味好吸引，所以都會望多幾眼👀 見今日冇乜人排隊，所以同同事入去試吓😍入到去，當然要叫返個燒味食吓啦，我哋怕啲飯太多，所以叫咗個迷你燒鵝飯～ 而餐廳推介左我哋食秘製蔥油豬扒煎蛋飯🍳 迷你燒鵝飯佢嘅燒鵝飯嘅皮燒得好脆，鵝身嘅肉好嫩滑，油份十足，加埋燒鵝醬，配埋白飯一齊食，真係一流😋秘製蔥油豬扒煎蛋飯呢個店舖推介嘅蔥油豬扒真係名不虛傳，豬扒好入味，咬落去好有口感，配埋秘製蔥油，十分香口👍🏻至於飲品方面，試咗佢嘅推介「夠薑奶茶 + 凍檸水」～ 第一次試薑味嘅奶茶，原來個味係好襯㗎，佢嘅奶茶好香滑，加埋薑蜜係底，啱晒而家嘅天氣凍凍地，夠晒暖胃🥰仲有例湯飲添㗎🤓好多野食選擇😋

大圍站出黎，好多野食，呢間店都好近地鐵，A出口一出，就可以見到有堆人企左係店門口等外賣。四寶飯 $60跟埋例湯，呢個價錢都算平民。四寶係半隻鹹蛋、叉燒、紅腸同油雞，叉燒微微燶邊，外皮黏上蜜汁，幾亮澤，屬半肥瘦，食落口都幾有口感，而且帶有蜜香。油雞係雞髀位，幾滑身，而且會俾兜薑蓉，油雞配飯，再搭配薑蓉🤤好食例湯今日個湯係青紅蘿蔔湯，都唔馬虎，唔係一般既味精湯，材料都幾多，幾清甜滋潤，岩哂而家凍凍地飲。配埋凍飲，埋單$67，咁豐富既晚飯黎講，唔算貴。

如題，收工諗住加餸，見新開又多人排隊，又話主打燒味，所以買半斤叉燒試下。睇相都應該知啲肉質係點啦，味道就一般偏下。基本上得頭尾位燒得香啲入味啲之外，其他嘅就好難食。👎🏽

大圍火車站A出口方向，新開一家主打王牌燒味/銷魂飯，裝修新派光鮮、門面招牌大塊搶眼的港式餐廳。王牌斬料 - 肥美腩叉 (半斤) $78 (外賣盒 +$1) 半斤 $78 / 一斤 $138 / 例牌·堂食 $88厚切！啖啖肉，肥美，仲有焦香燶邊，有肉香，有肉汁，燒得唔乾嚡，膏與肉比例好，肥膏位入口鬆化，唔膩，唔會一咬又淋又成口油！ 叉燒蜜汁，好香蜜糖甜！好食情懷大碗公飯 - 農場土雞飯 $58 (外賣盒 +$1) 農場土雞，肉質口感有彈性、唔韌，雞味夠濃，就算唔蘸附上的香蔥油及蒜頭豉油都夠香奉送老火例湯 是日供應例湯 ： 粉葛湯一碗已經見到有齊 ： 葛、扁豆、蜜棗、瘦肉，湯料足，難怪老火湯煲得咁夠味凍檸茶 (凍飲 +$5)紅茶味夠濃郁，唔錯_______________王牌·圍一叉燒 (大圍)大圍大圍道100號天寶樓地下8號舖_______________

今日5點幾收工，2個人晚飯，正唔知食咩好，經過附近新開既餐廳，門口掛既燒味睇相都見到有幾靚，好多人排緊外賣，我又去八下。見到好多人排隊斬料，而且都算多人，原來6點前仲有下午茶。我地2個叫左2個下午茶餐，一個义燒飯，一個燒鵝飯，跟餐仲有杯飲品，叫左一杯熱奶茶，一杯利賓納。番到屋企，打開比想像中大碗。义燒果然係招牌，唔太肥唔太瘦，食落口juicy 唔會乾柴柴。好細心，燒鵝飯有跟埋酸梅醬，入口亦肥瘦適中。2個餐連埋外賣盒加埋$82 only 。又多一間唔想煮飯之選

Wt’s a high-quality 燒味 restaurant in Tai Wai 🙏🙏 i was surprised the food is so yummy 🤤 It is different from other 茶餐廳，佢有好多燒味👍🏻 very fresh and juicy. We went for a tea. First comes to this barbecue 🍖 pork 脆脆豬。the beard is super crispy ! Love it so much . And the barbecue pork is very juicy. Perfect match with the honey 🍯 The other one is the 炸雞脾 & 炸薯角，very crispy . 啲肉好滑，好香脆，just cost $38! Worth trying 茶餐仲有可以揀蘋果粒紅茶！ 好好飲！啱晒冬天另外一杯，就係檸檬利賓納！

在大圍附近工作完，又是下午茶的時間。看見這間吃燒味的食店人山人海，就決定試試。輕量腩叉飯朋友在餐牌上發現了這個，起初以為是腩仔拼叉燒，經店員介紹才知道腩叉是以五花腩做的叉燒，製作腩叉比一般的叉燒要花上更多的工序，絕對是平凡中帶點不平凡！朋友吃得非常暢快。每塊叉燒都層次分明，相當肥美燒鵝瀨粉大大隻的燒鵝脾很吸引，而且皮下沒有肥膏，很好他們的湯亦相當惹味有層次。沒想到連酸梅醬都有驚喜，不會死甜而且有清新的酸梅味。以平民的價錢吃到高質的燒味，超值👍🏼

餐廳金色的門面甚為搶眼,樓高兩層,門口open kitchen的形式,燒味,叉燒,燒鵝等掛哂起係度,保留傳統燒味茶餐廳的特色,餐廳雖然新開,但相信亦頗受區內街坊歡迎 我一條友仔午餐時段去到要有條小人龍呀！ 星爺嘅《食神》,捧紅咗黯然銷魂飯,自此好多燒味茶餐廳,都會有此道菜!而此店家的主打就是叉燒,所以我坐低就點咗幸運銷魂飯做我嘅午餐 🔮幸運銷魂飯  上菜時以一隻太陽蛋覆蓋整個碗面,採用入口新鮮日本雞蛋,個蛋黃仲loop loop吓,真係有些急不及待咁篤穿佢來蛋汁撈飯.我輕輕咁夾開隻蛋, 就係一排半肥瘦叉燒, 肥瘦均勻,又有微燶邊, 肉質軟腍,入口鬆化, 外皮有炭烤香, 還有那個秘製的叉燒蜜汁,撈飯食一流呀！跟飯還有是日例湯～天天不同,我食當天就是合掌瓜 🔮姜蜜奶茶  生姜成幼條,以蜂蜜泡浸,香滑奶茶以此蜂蜜作甜味,甜薑味緊隨茶味口香出來,真係幾正,推呀！

大圍火車站近排開咗兩間新嘅餐廳，見到呢間餐廳都好多人去，所以就喺出面都等咗一陣，終於入到去，真係人來人往，而且好多人叫外賣，今次就叫咗個下午茶，腩叉瀨粉配凍檸檬茶，腩叉肉質沒有彈性，而且好Juice，冇好似平時啲叉燒咁樣乾爭爭，味道都唔錯☺️

身為沙田友，知道大圍火車站外面開左兩間新店，每次行唔都見好多人等外賣上網見評語好壞參半見呢日屋企無煮飯就過黎試下，價錢唔算好貴會幫你安排座位，態度都幾好不過座得略迫，全場都要搭枱中湯幾足料，幾夠味先叫個五寶飯賣相唔錯半肥瘦叉燒幾靚，幾淋而且入味唔鐘意半肥瘦亦可以要求要肥叉/瘦叉燒腩仔都唔錯，幾香口油雞都幾滑嫩口Xo醬滑蛋蝦仁飯個Xo醬豉油汁好惹味，好大碟，幾有驚喜凍檸茶大大杯好解喝食完之後發現又無評語講得咁差唔怪得門口成日咁多人等外賣

見呢間餐廳新開張無幾耐，經常經過呢間餐廳🍴都見到好多人排隊，街坊多數都係斬料買燒味返屋企慢慢食，但我呢排長期餓底😂，太餓控制唔到自己😂。見到呢度啲油雞、切雞、叉燒、燒味全部都好靚，靚到閃閃發光真係好吸引我😍，一於試下堂食燒味飯！我們叫了兩個雙併飯，包括：燒腩仔🐖燒鵝飯叉燒切雞🐓飯蘋果肉紅茶熱檸檬🍋水（仲送例湯）蘋果肉紅茶☕️：入面仲有啲新鮮蘋果肉係入面，配上蜜糖加埋一齊好好飲，係獨家飲品！係呢度先有架！叉燒：好腍唔會太乾，軟硬適中，唔會太肥唔會太瘦，剛剛好，加埋叉燒汁撈埋飯一齊食真係一絕！燒腩仔：好脆口！一定要配埋芥辣一齊食😆！燒鵝：鵝皮好脆亦唔會太油，最緊要配上專吃鵝的梅子醬，梅子醬真係有梅子係入面架！酸酸甜甜配上燒鵝突出了燒鵝的味道！白切雞：啲雞肉好滑，唔硬唔乾、又唔會太咸，加埋薑蔥蒜蓉真係正😋！我地食哂兩碗飯😋之後我地仲追加多一份燒鵝瀨粉😋，燒鵝+瀨粉真係perfect match!!!仲有早餐架！下次早餐都可以過黎食😋！去開呢頭或係附近住嘅街坊朋友都要試一試呀！真心推薦👍🏻推薦！👍🏻

試過呢間义燒，2次外賣都中伏第一次由於腩义燒售罄，店員推介左半肥瘦，結果係全瘦，肉又實又鞋搭搭第二次終於試到腩义燒，但明顯醃製時間不足，感覺就好似食緊 白灼豬腩肉 蜜糖另上

今日秋高氣爽～就諗住同朋友去踩單車🚴🏻‍♀️我哋決定由大1. 幸運銷魂飯 $68叉燒係屬於半肥瘦嘅，軟硬度適中，可惜可能店舖太多人，而廚師未能發揮得好，成份叉燒係有不同的味道。而日本蛋味濃，煎成燶邊👍🏻米飯我就略嫌偏乾身少少，飯成一粒粒，可以濕潤返少少，及再熱少少，整體感覺就一流啦☺️價錢：$63好味程度：😋😋/5個滿分價錢抵食度：💰/5個滿分整體感覺：❤️❤️/5個滿分推介程度：👍🏻👍🏻/5個滿分——————————————————————2. 燒味自選双併飯（叉燒，切雞湯米）叉燒屬於偏瘦，味道甜甜地，淋淋地，有少少蜜糖嘅味道，呢份全份嘅味道一致👍🏻顏色較上一份為深色，味道更勝一籌。切雞方便，我們指明要雞胸，因此要加$4，雞肉嫩滑，有雞味，味道適中，唔會有一種雪藏嘅味道。湯米方面，就非常之要讚，湯味濃郁，有濃濃嘅胡椒豬肚味，再加上一層濃厚嘅雞油，整碗湯都有濃烈嘅雞味👍🏻👍🏻如果，怕食雞油嘅女生，可以走雞油，湯就會係好清嘅濃湯，味道好好👍🏻價錢：$56好味程度：😋😋😋/5個滿分價錢抵食度：💰💰💰/5個滿分整體感覺：❤️❤️❤️❤️/5個滿分推介程度：👍🏻👍🏻👍🏻👍🏻/5個滿分—————————————