烏蠅館 (九龍中心大廈)

营业中

休息中

同事推介，專登去食午餐試下，冒菜好似車仔麵咁揀配菜 再揀湯底，$50 可以揀6 個配料，加$5 再加麵底我揀左麻辣湯底小辣加土豆粉，湯底有得再揀要唔要蔥，蒜，芫茜之類，好貼心。個人認為小辣辣度對我黎講岩岩好，蜂巢豆腐卜吸曬湯汁好好味😋不過麵條份量就比較偏少。飲品蜂蜜茉莉花茶，飲品唔甜有啲花香。整體食品同飲品都好出色，一定會再去

搬咗嚟新鋪之後第一次幫襯，因為每一次經過都好多人，所以今日專登12點左右就黎到，咁就唔使排隊。今次都係叫單人A餐，包左六個餸，另外加咗火鍋寬粉。今次叫咗淮山、蓮藕片，蘿蔔、芋絲、午餐肉、雞肉。雞肉我就覺得一般般，唔係好多用，而且連埋啲皮，食落去都比較肥。相反鮮淮山、蓮藕片、蘿蔔就份量比較多啲，每一樣都有三至四片，食埋芋絲同埋午餐肉其實都好夠飽。不過個人真係好鍾意佢嘅火鍋寬粉，好滑，好林，配埋個充滿蒜蓉嘅湯，連埋啲辣，真係一流！順帶一提，如果平時喺譚仔食開二小辣嘅話，喺呢度叫小/中辣都冇問題！

星期六放假 約左一個差唔多成年冇見嘅朋友食晏佢就推介左呢間烏蠅咁岩我又未食過 就就一於try try佢入到去見到個menu一頭霧水朋友就解釋番有四種主食分別係冒菜+湯（可配粉麵）、撈麵、水餃 同埋 碟頭飯然後 所有野飲另計我地兩個都叫左冒菜配火鍋麵同埋加杯桂花峰蜜 一熱一凍足料 甜度適中野食就等左大約5分鐘到睇上圖都知道我叫左咩餸 所以詳細唔講了有一點要提醒番大家嘅係 間唔中會有漏餸 所以記得檢查下碗麵好似我朋友咁 就漏左娃娃菜畀佢D餸好足料 味道都好正 尤其個墨丸好夠味BB辣有譚仔三小辣度 懷疑廚房落重手左Overall 埋單每人65蚊 食物野飲都對得住呢個價錢

因為見到上網有推介所以膽粗粗去咗試。叫咗個麻辣燙，拼豬腸腩肉萵筍鴨血生菜冬菇雞翼，揀咗BB辣，一上嚟個味道幾香，有啲麻但唔夠鹹，總體覺得呢個可以唔食。叫咗個糍粑，好好味，好趣好甜，四個女仔應該可以食兩碟。下次再試吓其他嘢食啦。

行街經過，望落好似幾正宗，就入去叫個麻辣火窩，湯底$108定唔知$118，上爐時望落好似好正，點知得個樣，除左勁大陣牛油味，沒有咩辣味、亦不夠麻。配料質素極普通，蝦膠墨魚膠雙拼，$98但得兩小粒，切開先得四粒（可惜沒影相但可參考其他食評相片）。雪花肥火$128得果十片，質素普通極度overpriced埋單三大人要成$800，已經係食平價配料好似魚皮餃果d，貴都唔緊要，真係難食..... 一定無下次。反而佢d辣麵又好似幾抵食$50六個餸大大碗。唯一讚既係佢個黑糖珍珠鮮奶幾好飲。

幾個嗜辣朋友一齊嚟叫左三刀魚+麻辣小辣上咗菜等佢滾嘅時候已經聞到勁香🤣因為有一個朋友未到本身諗住邊食邊等點知佢未到我哋已經食哂條魚🤣佢嚟到，我哋就再加左條多寶個人就鐘意食多寶嘅肉質多啲不過佢就冇咁多肉食三刀嘅魚味係濃啲同埋多肉啲我哋仲加咗好多配料超推薦寬粉同芋絲👍🏻索哂啲湯真係食唔停口🤣另外肥牛都幾有驚喜😍辣個方面🌶個人認為麻辣小辣=譚仔7小辣左右我本身食開3小，就覺得唔係幾夠喉😝

係附近番工，之前一直lunch 都見到好多人排隊想試下呢間麻辣店，今次終於比我試到😋🥘可能Lunch 時間比較多人，要排隊，不過地方算大，等左一陣就入到去餐廳午市茶單好似車仔麵咁，有6款同8款配菜比大家揀，不過我就覺得唔算好大食嘅人6個餸已經好夠😋佢仲有唔同嘅湯底比大家揀份量好足夠，d 麵都多，今次叫左雞肉，牛肉，豆卜，蘿蔔，豬大腸同魚腐，麻辣小辣❗️佢d 辣都幾勁，建議唔食得辣嘅量力而為🤣員工服務態度好好，知我覺得太辣，特登比醋我中和番，如果比清湯個味唔同左餐廳仲有唔同嘅特色飲品，今次叫左檸檬碟豆花，味道唔錯，都係加10蚊，不過就細杯左d😍但都值得飲

從亞士里道舊鋪食到呢道，真係好鐘意佢果種麻香，辣而不油，我每次去必叫腩片，豬红，大腸，佢就係可以加蒜，重口味，好好食，會再濃口D，有時會配下飯，當然鐵膽係寬粉下次試下蕃茄底

有點特別的餐廳名字: 烏蠅館🪰其實人地就好乾淨，一隻烏蠅都冇😂.平時聽到烏蠅都唔開胃，然而烏蠅館就係一間食開胃野的食店。其實佢主打野食有烤魚同麻辣火鍋，不過我就多數食佢午餐的粉麵。.五十幾蚊就有6餸或者8餸麵，車仔麵形式叫餸，每款餸都有2-4件，湯底的辣度都有得揀，而小辣都已經夠辣，今次食的是麻辣，火鍋麵，麵質比較粗，好有口感.加了錢飲黑糖雪燕鮮奶，係無期望情況下居然食到好夠燕窩😂😂，有點意外。

香港🇭🇰地最近愈開愈多四川菜館，大多數都係食酸菜魚、水煮野，傳統既四川冒菜就少之又少，最幾日意外地搵到呢間尖沙咀區既店，就黎試吓👍🏻👍🏻環境清靜，坐位又闊落，幾好坐，入座前會問你食烤魚定冒菜今次就試下佢個冒菜😋😋要左個四川酸湯，酸酸地好開胃，係唔算太辣，但整體來說好惹味，好食👍🏻👍🏻另外仲有大量蒜頭，好味😋配左寬粉，夠彈牙同好QQ，唔錯❗️❗️配菜方面要左金菇、豬大腸、肥牛、魚皮餃，其中豬大腸同肥牛出奇地好出色，推薦大家食下😋😋整體來講好好食，黎開尖沙咀一定要食❗️

一開始睇餐牌 個頭有勁多問號 到底咩係冒菜呢⁉️原來冒菜係成都小食嘅一種 將預備好嘅材料煮熟後放入辣味湯底中食用🔖 冒菜單人A餐(六款配菜) 麻辣味足夠 配料都多 岩晒平時選擇困難嘅你而小編揀咗生根 豆腐 薯仔片 鴨血 魚皮餃 娃娃菜呢個價錢 每款有2-3舊 超足料 真係超值! 麵底方面揀咗坊間少見嘅火鍋寬粉煮得剛剛好 唔會太淋 仍然保持到煙韌口感☺️🔖 川式韮菜豬肉紅油水餃餃子嘅餡肉都算多 夠飽滿 但餃子皮略嫌厚咗啲🔖 桂花蜂蜜冰粉感覺好清新 可以舒緩一下辣到㷫烚烚嘅嘴巴👅但小編都係比較鍾情原味 配翻紅糖好食啲

﹊﹊﹊﹊﹊﹊﹊﹊﹊﹊﹊﹊☞單人A餐 任選6款 50$黑豚肉+腩肉+鴨血+唐生菜+風琴豆腐串+竹笙 寬粉滋補菌湯Fat9認為食寬粉配辣既湯底會比較適合 酸辣又好麻辣又好點都會適合過唔辣既湯 寛粉都係襯辣先係perfect match🥲而佢既黑豚肉好鞋口 唔係好推介☹️至於鴨血 唔知係咪Fat9叫左唔辣既湯底 舊鴨血食落去會有陣腥味🤢但辣湯底既鴨血就冇呢個問題🧐﹊﹊﹊﹊﹊﹊﹊﹊﹊﹊﹊﹊✎ 單人B餐 任選8款 58$豆卜+豆皮+風琴豆腐串+雞髀菇蓮藕片+鴨胸+豬大腸+鴨血 寛粉麻辣bb辣竟然車仔麵有得揀寛粉Fat9表示好高興🤩加埋麻辣簡直絕配😋但Fat9叫左bb辣佢都幾辣下食到Fat9灌野飲🥵寛粉口感極抵讚 煙韌彈牙去到寛粉必叫📣!!!同埋佢餸既份量都多 唔會樣樣夾埋得幾舊👍🏻豬腸唔錯 唔會話太肥又唔會話得腸皮 幾好👍🏻但皮就同我想像出有出入 佢話係豆皮但佢上到檯係比腐皮🧐跟住其他餸都比較索汁 所以Fat9食到係咁灌野飲🤣﹊﹊﹊﹊﹊﹊﹊﹊﹊﹊﹊﹊☞豪華單人A餐 任選6款 內含鵝腸墨魚仔豬黃喉 78$肥牛+牛筋+豬腸+風琴豆腐串+鴨血+韮菜 寛粉麻辣小辣豬黃喉顧名思義就係豬既喉嚨管 佢食落去就冇

烏蠅館, 尖沙咀🍜呢到既#酸辣 湯底非常出色，湯底好濃郁，好似叫左個#酸菜魚 但佢直接放埋麵落去，完全唔係就咁溝水開。呢個價錢食到呢個質素真係物超所價，味道仲好食過好多好貴既川菜餐廳。高峰時期我每星期都食一次，有時LUNCHTIME會特登過尖沙咀食。其實我周不時都有係STORY同大家分享過呢間餐廳。湯底出色不在話下，餸方面都有好多選擇比你揀，份量仲要一D都唔少！我通常叫六個餸都已經食得好飽♥️麵方面我個人最鐘意土豆粉或薯粉，配酸辣湯底或者#麻辣 湯底都係一絕！最後，鐘意食#芫茜 既朋友，強烈推介你加多$1，多好多芫茜咖。😍.📍Shop G29, G/F, Kowloon Centre, 29-39 Ashley Road, Tsim Sha Tsui 🌟#HappiMuffin Rating: 9/10💰Price: $60-80 pp

之前一直好想試下依間🤤雖然對冒菜無咩大興趣但因為鐘意食辣所以都好想試下🤩冒菜配料多達56款😲✨而主食都有8款揀！真係想點自由配搭都得🥰.1. 單人A餐——任選6款（$50）// 依個價錢可以揀6款餸真係好抵🤩今次就揀咗竹笙，土豆片，娃娃菜，雞肉，肥牛同埋魚腐🥰而主食就揀咗火鍋寬粉～份量唔算好多但都絕對可以食得飽🤰🏻配菜雖然可以揀6款但係每樣嘅份量都係得1-2舊倒唔算好多🙈不過都比一般嘅抵啦😋至於麻辣湯底嘅辣度得小辣/大辣揀，而且聽講大辣可能都係得譚仔3小嘅程度所以就揀咗大辣🌶🌶大辣唔算好辣但都有少少後勁同埋微微辣喉嚨🤏🏼唔太食得辣嘅人最好揀返小辣或者其他湯底啦😚//Food：🌕🌕🌕🌕🌕🌘2. 川式韮菜豬肉紅油水餃🥟（$18/4隻）// 水餃都幾大粒😆不過食落就唔會好大驚喜，正正常常🙈而個辣紅油都幾好😋中規中矩，如果咁啱鐘意食水餃都會再嗌嘅✨//Food：🌕🌕🌕🌕🌗🌑.🪴由大廈搬咗去對面地舖之後空間好似大咗而且座位都多咗！如果經開尖沙咀都會想再食🥰🌶.🍲烏蠅館 (尖沙咀)尖沙咀亞士厘道29-39號九龍中心大廈地下G29號舖（📍將軍澳另設分店）.🍮#aiiifoodie#手繪 #尖沙咀 #

<熱辣辣烤魚💛>~~🐠招牌香辣烤魚 $228有三款魚選擇 分別係多寶魚 三刀魚同埋龍躉 我就揀咗多寶魚😋 食落比較多骨 但肉質比較滑😌 而且鰭位充滿油香🤤招牌香辣揀咗中辣🌶 味道都好惹味 蒜味🧄好出 不過食食吓個汁有少少苦😣每款烤魚都會贈送三款配菜 呢日係萵筍黑芋絲同埋木耳 最鍾意萵筍🥒 好新鮮 爽口清甜👍🏻.🐟魚腐 $52另外加錢叫左啲配料 魚腐係必點‼️每一粒都脹卜卜 煮耐啲就會吸晒湯嘅精華🤤 超級好食👍🏻~~評分📈味道 7/10環境 7/10性價比 7/10